"Azərbaycan Radiosu həm konsert salonu və teatr səhnəsi, həm qızğın idman oyunlarının getdiyi böyük stadion, həm maraqlı kitablar, həm də tanınmış şəxsiyyətlərlə görüş yeri idi. Radio onillər boyunca mötəbər bir məktəb, zövq və səviyyə tərbiyəçisi, yönəldici oldu. Azərbaycan insanı XX əsr boyunca həmişə yüksək səviyyəli mədəni-ədəbi elmi mühit içərisində olmasına, bu abu havada yetişib inkişaf etməsinə görə radioya borcludur", - deyə o, əlavə edib.

 

Onun sözlərinə görə, radiomuz var olduğu 1 əsrə çatan müddətdə qaynayır və yaşadığı şərəfli ömürlə millətinçi olduğunu çoxdan sübut edib. Radioda bütün millətin zəkası, istedadı, qabiliyyəti, həmin üstün keyfiyyətləri özündə birləşdirən parlaq övladları birləşirdi. Milli radio bütövlükdə Azərbaycanın qovuşan düşüncə və ilham gücünün bəhrəsi idi. Azərbaycan radiosu nəhəng bir sinif otağı, əzəmətli tədris auditoriyası idi ki, buradan hər kəsə işıq çatırdı. Hamı radionun cazibəsində idi, o, həm bilik verən məktəb, həm biliyi olanların savadını daha da artıran universitet idi.