Vaqif Poeziya Günlərinin təməli Ümummilli Lider Heydər Əliyevin təşəbbüsü ilə 1982-ci ildə Şuşada qoyulub. Məhz həmin tarixdə Ulu Öndərin iştirakı ilə Molla Pənah Vaqifin məqbərəsi və Poeziya Evi təntənəli şəkildə açılıb, Ümummilli Liderin tapşırığı ilə Vaqif Poeziya Günlərinin keçirilməsinə qərar verilib. 1991-ci ilə qədər hər il təşkil olunan bu poeziya bayramı ənənəvi olaraq şairin vətəni Qazaxdan başlayır və Şuşanın əsrarəngiz Cıdır düzündə başa çatırdı. Lakin 1990-cı illərdə Qarabağın işğalı ilə bu ənənəyə ara verildi.

Ənənə bu gün də davam edir. 2020-ci ildə Ali Baş Komandan İlham Əliyevin rəhbərliyi ilə əldə edilən tarixi Qələbə bu ənənənin yenidən doğuluşuna şərait yaratdı. 2021-ci ildən etibarən Şuşada Vaqif Poeziya Günləri bərpa olunaraq daha böyük ruhla keçirilməyə başlandı. Bu isə təkcə ədəbiyyat bayramı deyil, həm də milli qürur, azadlıq və torpaqlarımıza sahib çıxma əzminin təntənəsidir.

Bu il Vaqif Poeziya Günlərinin açılışı iyulun 14-də Molla Pənah Vaqifin doğulduğu Qazax rayonunda olub. İyulun 15-də Gəncə şəhərində, iyulun 16-da isə Ağdam rayonunda davam edib.

İyulun 22-23-də Azərbaycanın mədəniyyət paytaxtı Şuşa şəhərində yekunlaşacaq Vaqif Poeziya Günləri Heydər Əliyev Fondu, Azərbaycan Respublikası Mədəniyyət Nazirliyi və Yazıçılar Birliyinin dəstəyi ilə keçirilir.

Poeziya günləri çərçivəsində Şuşada istedadlı qələm sahiblərinin üzə çıxarılması məqsədilə “Vaqifə məktub” esse müsabiqəsi təşkil edilib. Müsabiqədə Nizami Gəncəvi adına Milli Azərbaycan Ədəbiyyatı Muzeyinin Beynəlxalq əlaqələr və dünya muzeyləri şöbəsinin elmi işçisi Natəvan Bağırova “Vaqifə müraciət” sərlövhəli esse ilə iştirak edib. Müəllif böyük şairin ruhuna poetik məktubla müraciət edib və Nizami muzeyinin ekspozisiyasında sərgilənən Molla Pənah Vaqifin  irsi fonunda Şuşanın azadlığı, 44 günlük Vətən müharibəsi, xalqın əzmi, qəhrəmanlığı xatırlanıb. Müəllif sanki Vaqiflə üz-üzə dayanaraq “Durnaların səsinə qovuşduğun gündür bu!” müjdəsini verir.   Pənahəli xanın “Gülləbatmaz köynəyi”ndən bəhs edir, Qarabağın ədəbi-bədii mühitini canlandıraraq görkəmli şəxsiyyətlərin adlarını sadalayır.

Müsabiqədə ikinci yerin qalibi olan əməkdaşımız Natəvan Bağırova diplom və pul mükafatı ilə təltif olunub. Mükafatları qaliblərə Türk Mədəniyyəti və İrsi Fondunun prezidenti Aktoti Raimkulova təqdim edib.

Tədbirdə Şuşa rayonunda Azərbaycan Respublikası Prezidentinin xüsusi nümayəndəsi Aydın Kərimov, mədəniyyət naziri Adil Kərimli, həmçinin Azərbaycan Yazıçılar Birliyinin sədri, Xalq yazıçısı Anar, Azərbaycanda Atatürk Mərkəzinin direktoru akademik Nizami Cəfərov iştirak ediblər.

 Poeziya Günləri çərçivəsində Şuşanın müxtəlif tarixi və mədəni məkanlarında – o cümlədən Heydər Əliyev Fondu tərəfindən bərpa olunan Molla Pənah Vaqifin muzey-məqbərə kompleksi, Natəvanın evi, Qarabağ oteli və Mehmandarovlar malikanəsində poeziya saatları, kitab sərgiləri və təqdimatları, musiqili kompozisiyalar, elmi konfrans, teatr tamaşaları və müxtəlif ədəbi-bədii proqramlar təşkil edilib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.