Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedən budəfəki proqram Azərbaycanın görkəmli bəstəkarı, Dövlət mükafatı laureatı, “Şöhrət” və “İstiqlal” (2005) ordenli, Xalq artisti Vasif Adıgözəlovun 90 illik yubileyinə həsr olunub.

Verilişdə akademik Rafael Hüseynov görkəmli bəstəkarın keçdiyi sənət yolundan, onun bənzərsiz istedadı və təkrarsız üslubundan, ailəsindən bəhs edib.

Bildirilib ki, Vasif Adıgözəlov 1935-ci il iyul ayının 28-də Bakıda məşhur muğam ustası Zülfü Adıgözəlovun ailəsində dünyaya göz açıb. İlk musiqi təhsilini konservatoriyanın nəzdindəki 10 illik musiqi məktəbində pianoçu kimi alıb. 1953-cü ildə Azərbaycan Dövlət Konservatoriyasına daxil olub. Bəstəkarlıq üzrə Qara Qarayevin, fortepiano üzrə Simuzər Quliyevanın sinfində təhsilini davam etdirib. 1959-cu ildə həmin təhsil ocağını iki ixtisas - pianoçu və bəstəkarlıq üzrə bitirib.

Akademik Rafael Hüseynov qeyd edib ki, 1958-ci ildən əmək fəaliyyətinə başlayan sənətkar müxtəlif mədəniyyət ocaqlarında məsul vəzifələrdə çalışıb. Vasif Adıgözəlovun yaradıcılığı milli musiqi mədəniyyətimizdə xüsusi rola və əhəmiyyətə malikdir. Bəstəkarın müxtəlif janrları əhatə edən yaradıcılığının çox hissəsini fortepiano üçün musiqi təşkil edir.

"İllər, onillər sovuşacaq, Vasif Adıgözəlov Azərbaycan bəstəçiliyinin zirvə sənətkarlarından birinə çevriləcək, həmişə yaşayası qiymətli əsərlər doğuracaq. Onun bəstələrində hər zaman iki əziz surət və onların dalğası aydın görünəcək: Qara Qarayev və Zülfü ruhu. Sinfanizmlə muğamatın üzvü qovuşuğu Vasif Adıgözəlovda elə kamil bir tərzdə ortaya çıxacaq ki, bu ahəngdarlıq eyni işi görmüşlərin heç də hər birində müşahidə edilməyəcək. Bu, tərbiyə ilə qanın elə qəlbə yatan vəhdəti idi ki, gec-tez mütləq "Natəvan" operası, "Qarabağ şikəstəsi", "Çanaqqala-1915", "Qəm karvanı" oratoriyaları, bir-birindən təsirli simfoniyalar, nəsil-nəsil dinləyicilərin ürəklərində və yaddaşlarında daimi yer tutacaq nəğmələr kimi bəhrələrini verməli idi", - deyə akademik Rafael Hüseynov bildirib.

Vurğulanıb ki, Vasif Adıgözəlovun yaratdığı ölməz sənət inciləri Azərbaycan musiqisinin ən dəyərli nümunələrindən biri kimi əsrlər boyu yaşayacaq, öz müəllifini heç zaman unudulmağa qoymayacaq. Bax, əsl sənətkarın da gücü və istedadı ondadır ki, onun yaratdıqları hər zaman əbədiyaşar olaraq qalır.

Verilişdə Xalq artisti Vasif Adıgözəlovun atası ilə bağlı xatirələri səsləndirilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.