Bu gün Nizami Gəncəvi adına Milli Azərbaycan Ədəbiyyatı Muzeyinin növbəti  qonaqları Bakı şəhəri Sabunçu Rayon İcra Hakimiyyətinin nümayəndələri oldu. Sabunçu Rayon İcra Hakimiyyəti başçısının müavini Rəna Vəliyeva və İcra Hakimiyyətində şöbə müdiri  vəzifəsini icra edən Ədalət Teymurovun rəhbərliyi ilə bir qrup gənc  Nizami Muzeyinin ekspozisiyası ilə tanış oldu.

Zəngin ədəbiyyatımızın  keçdiyi şərəfli yol, yazıçı və şairlərimizin ədəbi irsi muzeyin böyük elmi işçisi Gülnar Əqiqin təqdimatı ilə qonaqlarda dərin təəssürat yaratdı. Gənclər  milli ədəbiyyatımız, mədəniyyətimiz, tariximiz və incəsənətimiz barədə maraqlı məlumatlar  əldə etdilər. Ədəbiyyatımız hər zaman gənc nəslin tərbiyəsində, milli kimliyinin və  milli şüurunun formalaşmasında, onların  bədii təfəkkürünün inkişafında mühüm rol oynamışdır. Müasir dövrdə gənclərin vətənpərvərlik ruhunun inkişafında da ədəbiyyatımız, yaxın dövr tariximiz xüsusi yer tutur. Sabunçu rayonunun gənc könüllüləri muzeyimizdə nümayiş olunan qiymətli eksponatlar vasitəsilə Azərbaycan ədəbiyyatını bir daha  dərindən mənimsəyərək, bu günə qədər bilmədikləri faktlarla öz biliklərini zənginləşdirdilər. Nizami Gəncəvinin qəbrindən tapılmış parça nümunəsi, eləcə də Nizaminin Leninqradda (Sankt-Peterburq) İkinci Dünya müharibəsi zamanı Ermitaj  muzeyində keçirilmiş yubileyindən yadigar qalmış dəvətnamə gənclərin dahi şairə olan ehtiramını daha da yüksəltdi. 

Ekskursiyanın sonunda Milli Məclisin sədr müavini, Nizami Muzeyinin direktoru, akademik Rafael Hüseynov qonaqlarla görüşərək muzeyin yaranma tarixçəsindən söhbət açdı, bu məkanın Azərbaycanın cümhuriyyət tarixində böyük əhəmiyyət daşıdığını vurğuladı. Hər bir xalqın inkişafının təməlində söz və dilin durduğunu qeyd edən akademik muzeyin ədəbi-mədəni sərvətimizi qoruyub nəsillərə ötürən müqəddəs bir məkan olduğunu qeyd etdi.

Akademik Rafael Hüseynov eyni zamanda Sabunçu qəsəbəsində doğulub boya-başa çatan yazıçı, II Dünya Müharibəsi iştirakçısı Hüseyn Natiqin xalqımız və vətənimiz qarşısında xidmətlərindən danışaraq yazıçının Sabunçu rayonu ərazisində xatirəsinin əbədiləşdirilməsi ilə bağlı təklif irəli sürdü.

Akademik Rafael Hüseynov  çıxışında  gənclərə, Vətənimizin layiqli nümayəndəsi kimi yetişməyi, ulu öndər Heydər Əliyevin Azərbaycançılıq ideyasına sadiq olmağı, yurdun hər qarışının  qədrini bilməyi, ədəbiyyatımızı, tariximizi  dərindən mənimsəməyi tövsiyə etdi, gənclərə işlərində uğurlar arzuladı.

Sonda Sabunçu Rayon İcra Hakimiyyəti başçısının müavini Rəna Vəliyeva qonaqların adından muzey rəhbərliyinə minnətdarlığını bildirdi və İcra hakimiyyətinin təşkilatçılığı ilə baş tutan bu görüşün 1 Avqust – Ana dili Gününə həsr olunduğun vurğuladı. R. Vəliyeva bu günün məhz ulu öndər Heydər Əliyevin sərəncamı ilə Ana dili Günü elan edildiyini bildirərək ümummilli liderin dilimizə böyük diqqət və qayğısından bəhs etdi.

Görüşün sonunda qonaqlarla xatirə fotoşəkilləri çəkildi.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.