Tanınmış türkiyəli ədəbiyyatşünas, Muğla Sıtkı Koçman Universitetinin professoru Alaattin Karaca və Azərbaycan mühacirət ədəbiyyatının tədqiqatçısı, Lənkəran Dövlət Universitetinin professoru Abid Tahirli  Nizami Gəncəvi adına Milli Azərbaycan Ədəbiyyatı Muzeyinin qonağı olublar.

Ziyarət çərçivəsində qonaqlar Azərbaycan klassik ədəbiyyatının görkəmli nümayəndələri Nizami  Gəncəvi, Məhəmməd Füzuli, İmadəddin Nəsimi və digər dahilərin həyat və yaradıcılığını əks etdirən eksponatları maraqla izləyiblər. Professor Alaattin Karaca, xüsusilə  Nizami Gəncəvinin “Xəmsə”sinə  və Məhəmməd Füzulinin fəlsəfi-poetik dünyasına dair sərgilənən nümunələrə böyük  maraq göstərib.

Muzeyin elmi işçisi Aysel Məhərrəmova ziyarətçilərə təqdim olunan eksponatlar haqqında ətraflı məlumat verərək onların tarixi və ədəbi əhəmiyyətindən bəhs edib. O bildirib ki, muzey təkcə ədəbiyyat tarixinə aid məlumatları deyil, həm də milli kimliyi formalaşdıran dəyərləri qoruyub saxlayır.

Sonda professor Alaattin Karaca təəssüratını bu sözlərlə ifadə edib: “Azərbaycan tarixini, ədəbiyyatını bir film seyr edən kimi gözümüzün önündə canlandırdıq. Ortaq bir mədəniyyətin, ədəbiyyatın övladları olduğumuzdan qürur duydum.” Professor Abid Tahirli də bu ziyarətin həm elmi, həm də mənəvi baxımdan dəyərli olduğunu vurğulayıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.