Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında yayımlanan proqram Azərbaycan görkəmli alimi, həkim-bəstəkar, professor İbrahim Mustafa oğlu Topçubaşova həsr olunub.

Akademik Rafael Hüseynov qeyd edib ki, İbrahim Topçubaşov geniş dünyagörüşünə, müstəsna istedada və dərin zəkaya malik idi. Cərrahlığın müxtəlif sahələrində (abdominal və torakal cərrahlıqda, neyrocərrahlıqda, urologiyada) müvəffəqiyyətlə işləyib. Əlləri şəfalı cərrah olan İbrahim Topçubaşov həm də bu sənətin alimi idi. O, eyni zamanda, görkəmli bəstəkar idi. İbrahim Topçubaşovun bəstələdiyi "Süfrə", "İntizar", "Anacan", "Görüş", "Hamıdan göyçək", "Mən həmişə səninləyəm", "Qubalı qız", "Söz olmasaydı", "Ərəb qızına", "Karvan", "Xəzərim" və s. mahnıları bu gün də müğənnilərimizin repertuarını bəzəyir.

Diqqətə çatdırılıb ki, İbrahim Topçubaşov 1924-cü il noyabrın 5-də Bakı şəhərində anadan olub. Orta məktəbi bitirdikdən sonra N.Nərimanov adına Azərbaycan Dövlət Tibb İnstitutunun müalicə-profilaktika fakültəsinə daxil olub, 1946-cı ildə oranı fərqlənmə diplomu ilə bitirib. 1950-1953-cü illərdə Quba rayon xəstəxanasında Cərrahiyyə şöbəsinin müdiri vəzifəsində çalışıb. 1951-ci ildə "Analgezin keyitməsi zamanı xəstələrin sinir-psixi duyğuları" mövzusunda namizədlik, 1961-ci ildə "Mədəaltı vəzi və fater məməciyinin xərçəngi" mövzusunda doktorluq dissertasiyalarını müdafiə edib. 1958-ci ildə N.Nərimanov adına Azərbaycan Dövlət Tibb İnstitutunun Fakültə cərrahlığı kafedrasına dosent seçilib, 1963-cü ildə həmin kafedranın professoru olub.

Qeyd olunub ki, musiqinin cərrahiyyədə tətbiqi İbrahim Topçubaşovu daim düşündürən problem idi. Təbabət tarixində I dünya müharibəsinə qədər ilk dəfə Bexterev musiqinin müxtəlif xəstəliklərə təsiri məsələlərini öyrənib.

Rafael Hüseynov 1971-ci ildə Flora Kərimovanın ifasında professor İbrahim Topçubaşovun bəstlədiyi musiqini eşidən Bəxtiyar Vahbzadənin çox təsirləndiyini bildirib. Qeyd edib ki, İbrahim Topçubaşovanın mahnıları Azərbaycanda, hətta bir sıra xarici ölkələrdə müəllifinə şöhrət qazandırmışdır.

Professor İbrahim Topçubaşovu xeyirxah, güclü, şəfqətli insan kimi xarakterizə edən Rafael Hüseynov onun məhsuldar yaradıcılığının coşqun vaxtında - 23 fevral 1970-ci ildə vəfat etdiyini söyləyib. O, 45 il mənalı ömür yaşamış görkəmli cərrahın unudulmaz xatirəsinin onu tanıyanların, tibb ictimaiyyətinin, tələbələrinin xatirəsində əbədi yaşayacağını vurğulayıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.