Mədəniyyət kanalında “Vətənim” verilişinin dahi bəstəkar, Azərbaycan professional musiqi sənətinin banisi, Şərqdə ilk operanın yaradıcısı, böyük musiqişünas-alim, istedadlı publisist, dramaturq və pedaqoq, tanınmış ictimai xadim, Xalq artisti, Dövlət mükafatları laureatı, AMEA-nın həqiqi üzvü Üzeyir Hacıbəyliyə həsr olunan növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedən verilişdə çoxşaxəli yaradıcılığı ilə Azərbaycan mədəniyyəti tarixində silinməz izlər qoymuş qüdrətli şəxsiyyət Üzeyir Hacıbəylinin fəaliyyətindən bəhs olunub.

Akademik Rafael Hüseynov bildirib ki, Üzeyir Hacıbəyli dahi bəstəkar olmaqla yanaşı, mədəniyyət təşkilatçısı, ictimai xadim, Tanrının ona bağışladığı istedadı ilə bütövlükdə millət qurucusu idi. Üzeyir bəy o müstəsnalardandır ki, getsə də, varlığı hər gün görünür, hər an duyulur.

Diqqətə çatdırılıb ki, Üzeyir Hacıbəyli xalqımıza "Leyli və Məcnun", "Əsli və Kərəm", "O olmasın, bu olsun", "Arşın mal alan", "Koroğlu" kimi ölməz əsərlər yadigar qoyub, yaratdığı sənət inciləri ilə Azərbaycan insanının zövqünü şəkilləndirib.  Dahi bəstəkar Azərbaycanın və Şərqin ilk operasını yaradıb, həm də elə yolunun siftəsindən operanın yeni bir çeşidini - muğam operasını xəlq etməyə müvəffəq olub. 

"Üzeyir bəy yaşamaqda və təsirini göstərməkdə davam edir. Azərbaycan xalqı bu gün belə çağdaşdırsa, varlığında və gündəlik həyatında həm qanı və kökləri ilə bağlı olduğu Şərq, həm də dünyanın qəbul etdiyi Qərb mədəni dəyərlərini qovuşduraraq onların canayatan ahənginə sahibdirsə, bunun təməl səbəblərindən biri məhz Üzeyir Hacıbəylidir", - deyə akademik Rafael Hüseynov qeyd edib.

“Vətənim” verilişini buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.