Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialında dahi Azərbaycan bəstəkarı, Şərqdə ilk operanın yaradıcısı, böyük musiqişünas-alim, istedadlı publisist, dramaturq və pedaqoq, tanınmış ictimai xadim, AMEA-nın həqiqi üzvü Üzeyir Hacıbəylinin anadan olmasının 140 illiyi münasibəti ilə tədbir keçirilib.
Əvvəlcə Azərbaycan Respublikasıının Dövlət Himni səsləndirilib.
Tədbiri giriş nitqi ilə muzeyin Aran Regional filialının müdiri filologiya üzrə fəlsəfə doktoru Yaqut Bahadurqızı açaraq dahi bəstəkarın zəngin yaradıcılığı və elmi irsindən danışıb, onun milli musiqimizin inkişafındakı xidmətlərindən bəhs edib. Yaqut Bahadurqızı Üzeyir Hacıbəyli kimi şəxsiyyətlərin yalnız özləri üçün deyil, bütün xalqa, bəşəriyyətə xeyir gətirmək və tərəqqisinə səbəb olmaq üçün dünyaya gəldiklərini bildirib.

Üzeyir Hacıbəylinin Azərbaycan musiqi mədəniyyəti tarixində yeni istiqamət və milli bəstəkarlıq məktəbinin özülünü qoyduğunu vurğulayan Yaqut Bahadurqızı qeyd edib ki, görkəmli bəstəkar Azərbaycan musiqisi tarixində ilk opera, ilk musiqili komediya və bir sıra digər janrlarda ilk nümunələrin yaradıcısı kimi tarixə düşüb. O, ilk azərbaycanlı folklorçu-bəstəkar və Azərbaycan musiqisinin dərinliklərini araşdırıb üzə çıxarmış və əsaslandırmış ilk azərbaycanlı musiqişünas-alimdir.

Üzeyir Hacıbəylinin həm də ədəbi-bədii dəyərini itirməmiş yazıları ilə tanınan publisist, felyetonçu və librettoçu-dramaturq olduğunu söyləyən filial müdiri onun yenilikçi alim, ustad müəllim  və Azərbaycanda böyük musiqiçi-ictimaiyyətçı kimi, Şərqdə ilk musiqili teatrın və ilk Konservatoriyanın yaradıcısı kimi Azərbaycan xalqının tarixində və mədəniyyətində dərin iz qoyduğunu vurğulalayıb.

Daha sonra Kürdəmir Mədəniyyət Mərkəzinin bədii rəhbəri Sahilə Museyibova “Üzeyir Hacıbəylinin mədəniyyətimizə töhfələri” mövzusunda məruzə ilə çıxış edib. Məruzəçi bildirib ki, dahi bəstəkar Azərbaycan musiqisini dərindən araşdırmış, onun zəngin və çoxşaxəli olduğunu elmi məqalələrində göstərmişdir. O, 1921-ci ildə Bakıda azərbaycanlı tələbələr üçün ilk musiqi məktəbini — Azərbaycan Dövlət Türk Musiqi Məktəbini təşkil etmişdir. 1926-cı ildən Azərbaycan Dövlət Konservatoriyasında fəaliyyət göstərmiş, burada nəzəriyyə, harmoniya, Azərbaycan musiqisinin əsasları fənlərindən dərs demiş, konservatoriya yanında ilk çoxsəsli Azərbaycan xor kollektivi yaratmışdır.
Yubiley tədbirinin bədii hissəsində bəstəkarın şərqdə məşhur olan ölməz əsərlərindən parçalar səsləndirilib. Eyni zamanda, şagirdlərin Üzeyir Hacıbəylinin bədii əsərlərindən, kiçik miniatürlərindən ibarət hazırladıqları səhnəciklər tamaşaçılar tərəfindən alqışlarla qarşılanıb.
Tədbirdə, həmçinin Üzeyir Hacıbəyliyə həsr olunmuş Anarın “Üzeyir ömrü” filmindən bir parça nümayiş etdirilib. Tanınmış müğənni Sabir Hüseynov bəstəkarın məşhur “Sevgili canan” romansını ifa edib.
Mərasiç dahi bəstəkarın “Koroğlu” uvertürasının sədaları ilə başa çatıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.