Bakı Slavyan Universitetində (BSU) II Beynəlxalq Balkanşünaslıq konfransı keçirilib.

Əvvəlcə Azərbaycan Respublikasının Dövlət Himni səsləndirilib, Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib.

Tədbiri giriş nitqi ilə açan BSU-nun rektoru Anar Nağıyev balkanşünaslıq sahəsində beynəlxalq elmi əməkdaşlığı dərinləşdirmək, qarşılıqlı təcrübə mübadiləsi aparmaq və Azərbaycanla Balkan ölkələri arasında elmi-mədəni əlaqələri daha da inkişaf etdirmək baxımından konransın böyük əhəmiyyət daşıdığını vurğulayıb.

"Balkan ölkələri ilə Azərbaycanın tarixən mövcud olan dostluq və əməkdaşlıq əlaqələri bu sahədə elmi tədqiqatların aparılmasını zəruri edir", - deyə bildirən rektor Balkan ölkələrində də azərbaycanşünaslıq sahəsində mühüm araşdırmaların aparıldığını diqqətə çatdırıb. O, konfrans vasitəsilə həmin araşdırmaların elmi ictimaiyyətə təqdim ediləcəyini və bu sahədə əməkdaşlıqların daha sistemli və davamlı olunacağını qeyd edib.

Anar Nağıyev konfransın məhsuldar keçəcəyinə, burada iştirak edən bir sıra ölkələrin universitetlərləri, onların təmsilçiləri ilə əlaqələrin daha da genişləyəcəyinə ümidvar olduğunu bildirib.

Sonra Milli Məclisin sədr müavini, Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynov çıxış edərək Avropanın əhəmiyyətli paçası olan Balkan ölkələrinin azərbaycanlılara, türklərə bir çox cəhətdən doğma olduğunu söyləyib. Vurğulayıb ki, son 30 ildən artıq bir müddətdə Azərbaycanın Balkan ölkələri ilə siyasi, iqtisadi, mədəni-elmi əlaqələri daim yüksələn xətlə inkişaf edir və artıq ikinci dəfə keçirilən beynəlxalq Balkanşünaslıq konfransı bunu bir daha təsdiq edir.

Daha sonra energetika nazirinin müavini Elnur Soltanov, Şimali Makedoniyanın Skopye Müqəddəs Kiril və Mefodi Universitetinin rektoru Bilyana Angelova, Türkiyənin Ardahan Universitetinin rektoru Öztürk Emiroğlu, Albaniyanın Nyu-York Tirana Universitetinin rektoru Ali Güneş, Bolqarıstanın Müqəddəs Kliment Oxeidski adına Sofiya Universitetinin tədris məsələləri üzrə prorekroru Madlen Danova və başqaları çıxış edərək tədbirin elmi müzakirələrin aparılmasına gözəl fürsətlər yaratmaqla yanaşı, eyni zamanda, Azərbaycan ilə Balkan ölkələri, Türk dünyası ilə Balkanlar arasında elm, təhsil, tədqiqatlar mədəniyyət sahələrində əlaqələrin daha da genişləndirəcəyini söyləyibər. Çıxışlarda konfransın tarixi köklərimizi, ortaq mədəniyyətimizi, müasir əməkdaşlıq imkanlarımızı nəzərdən keçirmək və yeni körpülər qurmaq üçün böyük bir platforma olduğu qeyd olunub.

Konfransa onlayn qatılan ölkəmizin Albaniyadakı səfiri Anar Hüseynov Azərbaycanla-Albaniya arasında müxtəlif sahələr üzrə mövcud olan əməkdaşlıqdan söz açaraq, konfransın hər iki ölkənin alim və tədqiqatçıları üçün gələcək elmi fəaliyyətlərində mühüm rol oynacağını söyləyib.

Sonra tədbir bədii hissə ilə davam etdirilib.

Qeyd edək ki, 4 bölmə üzrə öz işini davam etdirən konfransda geniş Balkan regionunun tarixi, mədəniyyəti etnoqrafiyası, region geosiyasi məkanı, Azərbaycan və Türk dünyası ilə əlaqələrinə dair 100-dən artıq məruzə dinləniləcək.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.