Professor Cəlil Nağıyev yaxşı alimdir.

Bunu təsdiqləmək üçün onu heç şəxsən tanımağa da ehtiyac yoxdur - əsərlərini kim oxusa, bunu təsdiq edəcək.

Cəlil Nağıyev yaxşı müəllimdir.

Kim ki son yarım əsrdə onun tələbəsi olub, hamısı buna şərik çıxar. Cəlil Nağıyev yaxşı insandır.

Buna da onunla lap qısa müddətə təmasda olan "doĞrudur!" deyər.

Hər üçü çətindir. Ancaq üçünün eyni adamda qovuşması üçqatdan da neçə qat artıq çətindir.

Cəlil müəllimin 80 yaşının bayramını başqa məclislərdə də qeyd ediblər, yəqin hələ edəcəklər də.

Diz də Nizami muzeyində, Dissertasiya Şuramızın sentyabrın 26-dakı iclasından əvvəl onu təbrik etdik.

Mən də, professorlar Rəhilə Qeybullayeva da, Muxtar İmanov da, Asif Hacıyev də, Tərlan Quliyev də ürək sözlərimizi söylədik.

Cəlil müəllim "tərifin qədəri çox oldu" dedisə də, o, bundan artığına da layiqdir!

Əziz Cəlil müəllim!

Millətə, yurda sevginin vacib göstəricilərindən biri qulpundan yapışdığın işin səriştəli bilicisi olmaqdır. İnsan nə qədər peşəkardırsa, əslində əməli və doğurduqları ilə həm də az, ya çox dərəcədə xalqına və yurduna xidmət etmiş olur. Bu izin parlaqlığı çox olduqca xalqın və yurdun işığıına işıq artırır.

Bunlar elə qaçılmaz və sabit həqiqətlərdir ki, böyüklüyündən-kiçikliyindən asılı olmayaraq, hər peşəyə, hər sənətə və hər adama aiddir. Ancaq o peşə, o yol ümummilli mənalı bir məsləklə bağlı olanda, söz yox ki, mənası da, siqləti də dəfələrlə artır.

Siz alimsiniz və müəllimsiniz. Ömrünüz boyu da elə bunlarla məşğul olmusunuz. O istiqamət də, bu səmt də çox dəyərlidir və ayrı-ayrı xətlər olsalar da, bir-biri ilə sıx bağlıdırlar. Yaxşı müəllim həm də gözəl alim, gözəl alim həm də yaxşı müəllim olanda və bu keyfiyyətlər bir insanda birləşəndə, əlbəttə, o şəxsin faydalılıq və gərəklilik əmsalı da neçə qat artır. Amma üstəlik həm də bu Alim və Müəllim şəxsiyyətdirsə, yüksək insanlıq keyfiyyətlərinin daşıyıcısıdırsa, dönüb sərvət olur.

Əziz Cəlil müəllim, Sizin 1964-1969-cu illərdə Bakı Dövlət Universitetinin Filologiya fakültəsində təhsil almağınızı və 1969-1970-ci illərdə həmin dövrün yalnız Sovet İttifaqında deyil, dünyadakı sayılan elm və təhsil mərkəzlərindən olan M.V.Lomonosov adına Moskva Dövlət Universitetinin Filologiya fakültəsində staj keçib, 1970-1973-cü illərdə həmin universitetin Slavyan filologiyası kafedrasındakı aspirantura dövrünüzü də yüksək müəllimlik və alimlik yolunuzun müqəddiməsi kimi qəbul edərək hesaba alsaq, altı onildir ki, böyük ədəbiyyatlasınız. Bu isə ömür içində bütöv bir ömür deməkdir. Həmin ömrə bərabər uzun yol boyunca isə Siz harada çalışmısınızsa, həmişə yerinə yetirdiyiniz işə vicdanlı münasibətinizlə seçilmisiniz – müəllim kimi hər dərsinizə və tələbələrinizə ürəyinizi vermisiniz, alim kimi daim yeni söz deməyə can atmısınız. Nəyə səy göstərmisinizsə də, hamısına nail olmusunuz. Çünki müdam mühüm düstura sadiq olubsunuz – nə edibsinizsə, fədakarlıqla, eşqlə edibsiniz. Sadəliyiniz, səmimiyyətiniz, dürüstlüyünüz, saflığınızsa işinizə də, özünüzə də sayğını və istəyi qat-qat artırıb.

Əsərlərinizlə, elmimizə və təhsilimizə verdiyiniz töhfələrinizlə, qurucu fəaliyyətlərinizlə Siz millət xəzinəsində özünə yer tapmış bir şəxsiyyətsiniz və əlbəttə ki, xalqını, yurdunu uca tutan hər kəs gərək Cəlil müəllim kimi dəyərli Vətən övladlarının qədrini bilə, qiymətini verə!

Qədrinizi bilirik, ali qiymətinizi veririk, sevgimiz və sayğımız daim Sizinlədir!

 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.