26 Sentyabr tarixində Nizami muzeyi iki əməkdaşını yubiley münasibətilə təbrik edib.
Ömürlərinin iyirmi illik dövrünü Nizami muzeyi ilə bağlamış professor Kamil Allahyarovun yetmiş beş və muzeyin “Ədəbi layihələr və nəşrlər” şöbəsinin baş mütəxəssisi Elmira Sadıqovanın əlli yaşı muzeydə yubiley tədbiri ilə qeyd olunub.
Muzeyin direktoru akademik Rafael Hüseynov yubiley tədbirini giriş sözü ilə açaraq öncə professor Kamil Allahyarova ürək sözlərini çatdırıb. Alim qeyd edib ki, Kamil müəllim uzun illərdir ki, Azərbaycan şərqşünaslığında çalışmaqda və qədim ədəbi-mədəni irsi öyrənməkdədir. Bildirilib ki, o hələ yaradıcılığının başlanğıcından əlyazmalarla işləmiş, klassik irsi araşdırmaq istiqamətində böyük işlər görmüş, mətnlər hazırlayıb tərcümələr etməklə Azərbaycan ədəbiyyatşünaslığını, şərqşünaslığını zənginləşdirmişdir. Rafael müəllim onu da qeyd edib ki, alimin bütün digər elmi fəaliyyətlərinə gənc nəslin yetişdirilməsindəki töhfələri də əlavə olunmalıdır. Muzeyin elmi tədqiqatlarla məşğul olan onlarla doktorantı məhz Kamil Allahyarovun məsləhətlərindən bəhrələnmişdir.
Daha sonra akademik Rafael Hüseynov Nizami muzeyi kollektivinin səmimi arzu və diləklərini ifadə edən “Sözümüz” adlı təbrik ünvanı və gül dəstəsini Kamil Allahyarova təqdim edib. “Sözümüz” yazır:
Əziz Kamil müəllim!
Siz yarım əsrdən də bir az qabaq o vaxtlar təhsil şəbəkəmizdə tək olan Azərbaycan Dövlət Universitetinin Şərqşünaslıq fakültəsini bitirəndən sonra ömrünüzü bu vacib elm sahəsindəki araşdırmalara sərf etmisiniz. Orta əsrlər milli ədəbiyyatımızın ən zəngin və qiymətli qatı olsa da, bu sahə ilə bağlı araşdırmalar aparmaq həmişə çətin olmuş, tədqiqatçılardan xüsusi səriştələr, usanmazlıq, səbr, inadkarlıq tələb etmişdir. Çünki ədəbiyyatımızın zirvə şəxsiyyətlərinin yazıb-yaratdığı irsin əks olunduğu əlyazmalar dünya boyu kitab xəzinələrinə səpilmiş, onların əldə edilməsinin mürəkkəbliyindən savayı oxunması, təhrifsiz şəkildə nəşr edilməsi və öyrənilməsi həmişə ağır zəhmətli iş olmuşdur. Ona görə də bu sahəyə meyl edənlər az olmuş, mətnşünaslıqla ən fədakar və milli söz sərvətlərimizə sədaqətli alimlər məşğul olmuşlar. Elə bircə Sizin 50 il boyunca klassik irsimizi və əlyazma yatırımızı daimi diqqətdə saxlamanız, sözümüzün ötmüş əsrlərdə ömür sürmüş böyük yaradıcıları ilə bağlı araşdırmalar apararaq bir-birindən sanballı əsərlər doğurmanız həm yüksək təqdirlərə layiqdir, həm də Sizin vətənpərvərliyininzin aydın ifadəsidir. Sizin “Əmir Şahi divanının tekstoloji tədqiqi”ndən başlanan böyük elm yolunuz “Azərbaycan şeir sənətinin genezisi, formalaşması və təkamül yolları” kimi fundamental araşdırmanızla davam etdi və illər boyu bu sıraya artıq sayı 200-ü aşan ciddi məqalələr, 11 kitab və 4 monoqrafiya əlavə edildi.
Nizami Gəncəvi adına Milli Azərbaycan Ədəbiyyatı Muzeyində çalışdığınız illər ərzində siz qiymətli tədqiqatlarınızın ardınca olmaqla yanaşı, gənc alimlər nəslinin yetişməsinə də layiqli töhfələrinizi vermisiniz, muzeyin elmi həyatında həmişə fəal mövqeyinizlə seçilmisiniz.
Əziz Kamil müəllim!
XXI yüzilin ilk rübü başa çatır. Arzu edirik ki, bu əsrin növbəti rübünü də sağlam, əli qələmli və şövqlü arxada qoyasınız ki, Sizin həmin vaxta təsadüf edəcək daha yuvarlaq ildönümünüzü də fərəhlə bayram edək!
Rafael Hüseynov
Nizami Gəncəvi adına Milli
Azərbaycan Ədəbiyyatı Muzeyinin
direktoru, akademik Bakı şəhəri, 22 sentyabr, 2025

Daha sonra Rafael Hüseynov muzeyin digər əməkdaşı – “Ədəbi layihələr və nəşrlər” şöbəsinin baş mütəxəssisi Elmira Sadıqovanı 50 illik yubileyi münasibətilə təbrik edərək onun həm Hüseyn Cavidin ev muzeyi, həm də Nizami muzeyindəki yorulmaz fəaliyyətindən, insanlıq xüsusiyyətlərindən bəhs edib.
Akademik, Elmira Sadıqovaya muzey əməkdaşları adından “Sözümüz” adlı təbrik ünvanı və gül dəstəsini təqdim edib. “Sözümüz” yazır:
Əziz Elmira xanım!
Sizin dahi Hüseyn Cavidin Ev Muzeyindən ədəbiyyata bağlanan yolunuz artıq 17 ildir ki, Nizami Gəncəvi adına Milli Azərbaycan Ədəbiyyatı Muzeyində davam etməkdədir. Cavidin ev muzeyində keçən illəriniz həm də onunla əlamətdar idi ki, Siz ölməz şairin yadigarı Turan Cavidin rəhbərliyi altında işləyirdiniz. Həmin muzeyin qurucusu və Cavidşünaslıq şöbəsinin ilk rəhbəri olduğumdan Cavidin ev muzeyinin çox da böyük olmayan kollektivinin hər bir üzvünün fəaliyyətinə mən yaxşı bələd idim. Siz işgüzarlığınız, səmimiyyətiniz, incə mədəni davranışınız və rəftarınızla hər bir kəsin rəğbətini qazanmışdınız. Elə həmin keyfiyyətləriniz Nizami muzeyinə gəldiyiniz ilk vaxtlardan yeni kollektivlə də tezliklə isinişməyinizə səbəb oldu. Təsadüfi deyil ki, Siz kollektivin bütün üzvləri ilə daimi təmaslar tələb edən kadrlar şöbəsinin müdiri vəzifəsini uzun müddət uğurla apardınız. Bu gün də Siz muzeyin “Ədəbi layihələr və nəşrlər” şöbəsinin baş mütəxəssis kimi ümumi işimizin daha yüksək səviyyədə aparılmasından ötrü bacardığınızı əsirgəmirsiniz.
Sizi yuvarlaq ildönümünüz münasibətilə ürəkdən təbrik edir, sağlam, xoşbəxt ömür yaşamanızı, daim kollektivin sevimlisi olaraq qalmanızı arzulayırıq!

Rafael Hüseynov
Nizami Gəncəvi adına Milli
Azərbaycan Ədəbiyyatı Muzeyinin
direktoru, akademik Bakı şəhəri, 22 sentyabr, 2025