Ukraynanın Azərbaycandakı səfirliyi tərəfindən Ukraynanın dövlət müstəqilliyinin 34-cü ildönümünə və Ukraynanın Müdafiəçiləri Gününə həsr edilmiş tədbir keçirilib.

Əvvəlcə Azərbaycan və Ukrayna respublikalarının Dövlət Himnləri səsləndirilib.

Tədbiri giriş nitqi ilə Ukraynanın Azərbaycandakı Fövqəladə və səlahiyyətli səfiri Yuri Qusev açaraq Ukrayna və Azərbaycan xalqlarının çoxəsrlik əməkdaşlıq və dostluq əlaqələrindən danışıb.

Daha sonra Milli Məclisin sədr müavini, Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynov çıxış edərək bu günün Ukraynanın tarix boyu qazandığı ən ali nemətin – istiqlalın, dövlət müstəqilliyinin təntənəsi olduğunu vurğulayıb. Bildirib ki, bu iki bayram Ukraynada son nəfərinədək bütün xalqın və dövlətin sevincini bərabər bölüşdüyü bayramdır. Bu iki bayram bütün millətinki və son qarış torpağınadək bütün Vətəninki olduğundan həmişə ən birinci, ən ali, ən sevimli olaraq qalacaqdır.

 

"Bu iki müqəddəs bayramın nüvəsini təşkil edən istiqlal, dövlət müstəqilliyi elə sərvətdir ki, onu hər gün, hər saat deyil, hər an, hər göz qırpımında qorumaq lazımdır", - deyən akademik Rafael Hüseynov vurğulayıb ki, bu gün ölkənin azadlığının, müstəqilliyinin, sərhədlərinin, ləyaqətinin, şərəfinin mərd qoruyucularının bayramıdır. Bugünkü bayramın Ukraynanın millət təqvimində dəyərini artıran, ona xüsusi məna verən, onu rəmziləşdirən əsas qismi odur ki, bu bayramın möhtəşəm fəlsəfəsinə baxdıqda arxada qalan 4 ilə yaxın müddətdə Ukraynanın cəsur qadınları və kişiləri canları ilə sadiq olduqlarını qəhrəmancasına sübuta yetiriblər.

 

Azərbaycan və Ukrayna xalqları arasında dostluq münasibətlərinin tarixi köklərə malik olduğunu söyləyən akademik Rafael Hüseynov müstəqillik illərində ölkələrimizin siyasi, iqtisadi və humanitar sahələrdə sıx əməkdaşlıq etdiyini, beynəlxalq təşkilatlar çərçivəsində bir-birinin mövqeyini daim dəstəklədiklərini bildirib. Qeyd edib ki, bu gün də ölkələrimizi qarşılıqlı hörmət, etimad və strateji tərəfdaşlıq ruhu birləşdirir. Hazırda sağlam əsaslar üzərində qurulmuş münasibətlər inkişaf edir və yeni məzmunla zənginləşir.

 

"Azərbaycan Prezidenti İlham Əliyevin və Ukrayna Prezidenti Volodimir Zelenskinin görüşləri, imzalanmış sənədlər və birgə bəyanatlar ölkələr arasında münasibətlərin möhkəm təməlini yaratmışdır. Ərazi bütövlüyü və suverenlik məsələlərində ölkələrimizin beynəlxalq hüququn norma və prinsiplərinə uyğun olaraq qarşılıqlı dəstək və həmrəylik nümayiş etdirməsi təqdirəlayiqdir. İnanıram ki, Azərbaycan və Ukrayna xalqları arasında dostluq və əməkdaşlıq əlaqələri bundan sonra da inkişaf edəcək, qarşılıqlı dəstək və həmrəylik üzərində möhkəmlənəcəkdir",- deyə o, əlavə edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.