AMEA Azərbaycanın zəka yükünü daşıyan vacib elmi qurum kimi XX yüzil içərisində xalqımızın milli ruhunun yüksəlişində müstəsna rol oynayıb. Bu elm məbədi Azərbaycan xalqının əsrlərin keçmişindən gələn böyük zəka enerjisini yeni zamana ötürməyi bacarır. AMEA-nın yuvarlaq ildönümü ərəfəsində keçmişə nəzər salaraq Azərbaycanın böyük alimlərini, dünya elmində öz imzasını qoymuş görkəmli elm xadimlərini yad etmək olduqca vacibdir. Bu alimlər dünya zəka xəritəsində Azərbaycanı layiqincə təmsil ediblər.

Bu fikirləri  Milli Məclisin vitse-spikeri, Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynov Bakı Dövlət Universitetində AMEA-nın 80 illiyi münasibətilə təşkil olunmuş yubiley tədbirində çıxışı zamanı bildirib.

Azərbaycanda Akademiya anlayışının yeni bir hadisə olmadığını söyləyən akademik Rafael Hüseynov vurğulayıb ki, hələ XIII əsrdə azərbaycanlı alim Nəsirəddin Tusinin yaratdığı Marağa rəsədxanası mahiyyəti və fəlsəfəsi ilə əsl Elmlər Akademiyası olub. Müxtəlif coğrafiyadan olan alimləri təmsil edən bu rəsədxana həmin dövrdə Şərqdə ilk çoxsahəli elm ocağı idi. Buna bənzər beynəlmiləl çərçivəli digər Akademiya isə 14-cü yüzillikdə Fəzlüllah Rəşidəddinin Təbriz şəhərində yaratdığı “Rəşidiyyə” mədrəsəsi idi.

“Azərbaycanda elmin və elm quruculuğunun tarixinə nəzər salsaq XIII əsrdəki Marağa rəsədxanası və “Rəşidiyyə” mədrəsəsini xüsusi qeyd etmək lazımdır. Azərbaycan Milli Elmlər Akademiyasının kökü isə 1923-cü ildə yaradılmış Azərbaycan Tədqiq və Tətəbbö Cəmiyyətindən başlayır. Respublikanın baş elmi müəssisəsi olan bu cəmiyyətin tərkibinə bir sıra elmi bölmələr daxil edilmişdi. Cəmiyyətin ətrafında mükəmməl ziyalı qüvvə toplaşmışdı və akademikləşmiş struktur formalaşmışdı”, - deyə alim bildirib.

Akademik Rafael Hüseynov AMEA-nın böyük tarixi sınaqlardan keçdiyini, bir sıra alimlərin siyasi repressiyaların qurbanı olduğunu söyləyib. O,  AMEA-nın taleyində və tarixində Ulu Öndər Heydər Əliyevin əvəzsiz rolundan bəhs edərək vurğulayıb ki, Azərbaycan elminə hər zaman həs­saslıqla yanaşan dahi lider AMEA-nın inkişaf etməsinə qay­ğısını heç vaxt əsirgəməyib, bu elmi qurumu qoruyub, dilçəldib. Xalqına dərindən bağlanan, həyatını Azər­baycanın tərəqqisinə həsr edən Ulu Öndər Azərbaycan Milli Elmlər Aka­demiyasının fəaliyyətini daim diqqət mərkəzində saxlayıb və onun dünya miq­yasında tanınmasına nail olub.

Hazırda bu yolun Heydər Əliyev siyasi irsinin layiqli davamçısı Prezident İlham Əliyev tərəfindən uğurla davam etdirildiyini deyən akademik Rafael Hüseynov son illərdə Azərbaycan elminin ölkə başçısının diqqət və qayğısı sayəsində daha yüksək inkişaf mərhələsinə qədəm qoyduğunu bildirib. Qeyd edib ki, Prezident İlham Əliyevin “Azərbaycan Milli Elmlər Akademiyasının 80 illiyinin qeyd edilməsi haqqında” 2025-ci il 18 mart tarixli Sərəncamı Azərbaycan elminə, Azərbaycan ziyalısına və Akademiyaya verilən yüksək qiymətin ifadəsidir.

“Elm və təhsilin inteqrasiyası, elmin populyarlaşdırılması qloballaşan dünyada müasir dövrün əsas tələblərindəndir,” – deyən alim vurğulayıb ki, bu iki sahənin vəhdət halında inkişafı daha uğurlu nəticələrə gətirib çıxaracaq. Akademik Rafael Hüseynov bildirib ki, yeni dövrün çağırışları fonunda Elm və Təhsil Nazirliyi ilə AMEA-nın imkan və potensialından birgə şəkildə istifadə edilməli, ölkənin elm və təhsil sistemi dünya standartlarına uyğun şəkildə modernləşdirilməlidir: “Əminəm ki, alim və mütəxəssislərimiz, ziyalılarımız bu istiqamətdə səylərini birləşdirərsə, Azərbaycan elminin və təhsilinin böyük nailiyyətlərinin, yeni zəfərlərinin şahidi olacağıq”.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.