Mədəniyyət kanalında “Vətənim” verlişinin müasir Azərbaycan ədəbiyyatında qəzəl janrının görkəmli nümayəndəsi, Füzuli ənənələrinin davamçısı Əlağa Vahidə həsr olunmuş ilk buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedən verilişdə söz adamı Əliağa Vahidin həyatı, yaradıcılığı, şairlik fəaliyyəti və ədəbi irsindən bəhs edilib.

Akademik Rafael Hüseynov bildirib ki, Əliağa Vahid 1895-ci ildə Bakı şəhərində anadan olub, gənc yaşlarında atasını itirib. Mədrəsədə oxumağa başlayan şair daha sonra ehtiyac üzündən təhsilini yarımçıq qoyaraq xarratlıq edib.

Diqqətə çatdırılıb ki, ürəyi sözün yanında olan Vahid gənc yaşlarında Bakıdakı "Məcməüş-şüəra" ədəbi məclisində iştirak edib və ilk günlərdən rəqib kimi qəbul olunub. Abşeron şeir məclislərinin ağsaqqalları Vahidin qəzəllərinə rəğbət bəsləyiblər. Mənzilində şeir məclisləri düzəldən Mirzə Əbdülxalıq Yusif müasir qəzəl ənənəsini yaradan Əliağa Vahid yaradıcılığına xüsusi yanaşıb, ona dəstək göstərib, həvəsləndirib. O, Azər (İmaməliyev), Müniri və b. şairlərin təsiri ilə lirik şeirlər yazıb.

Verilişdə görkəmli ədibimiz və ədəbiyyatşünas alimimiz Həmid Məmmədzadənin ustad qəzəlxanla bağlı xatirələri səsləndirilib. Onun Əliağa Vahidi klasssik ədəbiyyatın bilicisi kimi dəyərləndirdiyi bildirilib.

Qeyd olunub ki, Azərbaycanda, eləcə də Yaxın Şərqdə qəzəl şairi kimi şöhrət qazanmış Əliağa Vahidin əsərləri poetik dilinin sadəliyi, xəlqiliyi və ahəngdarlığı ilə seçilir, xanəndələrin repertuarında mühüm yer tutur. O, Nizami, Xaqani, Nəvai və digər şairlərin qəzəllərini Azərbaycan dilinə tərcümə edib.

"Vahidin qəzəlləri qoşa alma kimi köhnələrə bənzəsə də, onlardan xeyli fərqlənirdi", - deyən akademik Rafael Hüseynov vurğulayıb ki, onun yaratdığı əsərlər dillər əzbərinə çevrilərək əbədiyaşarlıq qazanıb. Qəzəlxanın zəngin yaradıcılığı xalqımızın mədəni mirası kimi yüksək qiymətləndirilir.

Verilişdə şairin böyük Füzuli ənənələrini davam etdirən misraları diqqətə çatdırılıb, qəzəlləri dinlənilib. Həmçinin tanınmış xanəndələrin ifasında ustad sənətkarın qəzəllərinə bəstələnmiş musiqilər səsləndirilib.

“Vətənim” verilişini buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.