AMEA-nın Məhəmməd Füzuli adına Əlyazmalar İnstitutunun Elmi şurasının qərarı ilə XX əsr Azərbaycan ədəbiyyatının görkəmli nümayəndəsi, qəzəlxan şair, tərcüməçi, pedaqoq və ictimai xadim Azər Buzovnalının 155 illik yubileyinə həsr olunmuş “Azər Buzovnalı. Əsərləri. IV kitab (Şeirlər və mənzum hekayələr)” kitabı işıq üzü görüb.

Kitabın tərtibçisi, ərəb əlifbasından transfoneliterasiya edib nəşrə hazırlayan, müqəddimə və lüğətin müəllifi institutun Şəxsi arxivlərin tədqiqi şöbəsinin aparıcı elmi işçisi fil.ü.f.d., dosent Könül Bağırovadır.

Kitabda AMEA Məhəmməd Füzuli adına Əlyazmalar İnstitutunun xəzinəsində və Azər Buzovnalının (1870-1951) şəxsi arxivində saxlanılan əlyazmaları: şeirləri (qəzəllər, qəsidələr, qitələr, müstəzad, rübailər), mənzum hekayələri ilk dəfə transfoneliterasiya olunaraq nəşrə təqdim edilmişdir. Azər Buzovnalının milli-mənəvi dəyərləri təbliğ edən yaradıcılıq nümunələri bu gün də əks etdirdiyi ali hisslər, yüksək humanist duyğular baxımından aktualdır. Şairin klassik üslubda yazdığı əsərlərinin dil-üslub xüsusiyyətləri dəyişdirilməmiş, tam orijinala uyğun çapa hazırlanmışdır. Kitab tədqiqatçılar, alimlər və tələbələr üçün dəyərli mənbə hesab oluna bilər.

Qeyd edək ki, yeni nəşrin elmi redaktoru və kitabda yer alan “Könülün könül verdiyi yadigarlar” başlıqlı “Ön söz”ün müəllifi akademik Rafael Hüseynov, rəyçiləri fil.e.d., dosent Nailə Səmədova və fil.e.d., dosent Qətibə Quliyevadır.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.