Nizami Gəncəvi adına Milli Azərbaycan Ədəbiyyatı Muzeyinin qonağı əslən kərküklü, hazırda isə Kanadanın Toronto şəhərində memar kimi fəaliyyət göstərən və yaşayan Çingiz Kuzəçioğlu olub. O, İraq türkmanlarının görkəmli müğənnisi, Kərkük musiqi mühitinin unudulmaz sənətkarı Əbdülvahid Kuzəçioğlunun övladıdır.

Özünəməxsus üslubu və məlahətli səsi ilə seçilən Əbdülvahid Kuzəçioğlu “Rast” muğamından “Bəsiri”, “Hicaz” muğamından “Muçala”, “Segah” muğamından “Müxalif”i ifa edib. Onun ifa etdiyi mahnılar Azərbaycanda “Kərkük havaları” adı altında tanınıb və böyük sevgi ilə dinlənilib. Sənətkar,  həmçinin Səməd Vurğun və Rəsul Rza  kimi görkəmli Azərbaycan şairlərinin sözlərinə musiqilər bəstələyib. Musiqisi və sözləri Əbdülvahid Kuzəçioğluna məxsus, kərküklü Sinan Səid və Nərminə Məmmədovanın ifasında səslənən, günümüzə kimi sevilən “Evlərinin önü yonca” mahnısı isə dillər əzbəri olub.

Qonağı muzeyin ekspozisiyası, o cümlədən İraq–türkman ədəbiyyatını əks etdirən bölmə ilə filologiya üzrə fəlsəfə doktoru Sevinc Heydərova tanış edib. Burada həmyerliləri – Əta Tərzibaşı, İhsan Doğramacı, Şahir Sabir Zabit, Əbdüllətif Bəndəroğlu və Sinan Səidin portretləri ilə yanaşı atası Əbdülvahid Kuzəçioğlunun portretini görən Çingiz Kuzəçioğlu böyük sevinc və qürur hissi keçirib.

Sonda Çingiz Kuzəçioğlu rəylər və təəssüratlar kitabına ürək sözlərini qeyd edib: “Ədəbiyyat Muzeyində yaşadığım sevinci sözlə ifadə edə bilmirəm. Muzeydə çox məlumat əldə etdim. Xüsusilə Kərkük bölümünə daxil olduğumda həm sevindim, həm də təsirləndim. Atamın portretini burada görmək mənim üçün həm qürur, həm də dərin duyğularla dolu bir an yaşatdı.”

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.