Mədəniyyət kanalında “Vətənim” verlişinin müasir Azərbaycan ədəbiyyatında qəzəl janrının görkəmli nümayəndəsi, Füzuli ənənələrinin davamçısı Əlağa Vahidə həsr olunmuş ikinci buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedən verilişdə söz adamı Əliağa Vahidin zəngin ədəbi irsindən, yaşadığı dövrdən bəhs edilib.

Akademik Rafael Hüseynov qeyd edib ki, şeir yazmağa uşaq yaşlarından başlayan Əliağa Vahid şeirlər aləminə nüfuz edib, ilk yazdığı "İlahi, tabeyəm eşqə, məni hifz et bəlalərdən, Sənə ərz eyləyim, ya rəb, bu yari-naxudalərdən" adlı şeir onun gənc yaşlarından artıq yetişmiş şair olduğunu göstərir. Əliağa Vahid daim öz hazırcavablığı ilə seçilib.

"Ədəbiyyatda yolunu yeni başlayan insanın təmaslara ehtiyacı çox olur və xoşbəxtlikdən həmin dövrdə bir-birindən qüvvətli xeyli şairlər var idi", - deyən akademik Rafael Hüseynov Əliağa Vahidin Seyid Zərgər və Məşədi Azərlə münasibətlərindən danışıb. Bildirilib ki, Əliağa Vahid Azəri özünün ustadı sayıb. Qəzəlxanın ilk şeiri 1914-cü ilin may ayında "İqbal" qəzetində işıq üzü görüb. Baki ədəbi mühitinin tanınımış qəzəl şairi Mirzə Əbdülxalıq Yusif Əliağaya “Vahid” təxəllüsünü götürməyi məsləhət bilib. 

Diqqətə çatdırılıb ki, Vahidin şeirlərində klassik ədəbiyyatda olduğu kimi, əvvəldən sonadək mey və şərab var. Lakin ədibin həyatındakı meylə şeirlərindəki meyin fərqi var. Mürəkkəb bir dövrün içərisində yaşayan şair mey içməklə özünü həm də sovet sisteminin təpkilərindən  qoruyub. 

Verilişdə Əliağa Vahidin Cəfər Cabbarlıyla dostluq münasibətlərindən, “Babayi-Əmir” satirik jurnalında çıxan şeirlərindən bəhs edilib.

Akademik Rafael Hüseynov Vahidin sevgi və məhəbbət şeirlərinin səmimiyyətlə dolu olduğunu, onun xalçaçı Yaqubun qızı Zülfiyyəni sevdiyini, lakin ilk sevda daşının daşa dəydiyini söyləyib.

Qeyd olunub ki, Əməkdar incəsənət xadimi olan Əliağa Vahid 30 sentyabr 1965-ci ildə sonatoriyada vəfat edib. Əliağa Vahidlə vida mərasimi oktyabrın 3-də Yazıçılar İttifaqının Natəvan klubunda keçirilib. Yüzlərlə insan Əliağa Vahidin Fəxri Xiyabanda dəfn olunması xahişilə Yazıçılar İttifaqına müraciət edib. Dəfn Komissiyasının sədri, "Kirpi" jurnalının baş redaktoru, yazıçı Seyfəddin Dağlı Mərkəzi Komitə rəhbərliyi ilə danışıb xalqın istəyini çatdırıb. Respublika rəhbərliyi insanların xahişini nəzərə alaraq şairin Fəxri Xiyabanda dəfninə razılıq verib. Şairin tabutunu xalq Fəxri Xiyabana qədər çiynində aparib. Dəfn prossesində minlərlə vahidsevərlər iştirak edib. Bu, Əliağa Vahid yaradıcılığına verilən xalq dəyəri, təmənnasız xalq sevgisi idi.

“Vətənim” verilişini buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.