Azərbaycan Radiosunda Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında “Axşam görüşləri” proqramının növbəti buraxılışı
yayımlanıb.Budəfəki proqram Xalq artisti Ağasəlim Abdullayevə həsr olunub.
Akademik Rafael Hüseynov qeyd edib ki, Ağasəlim Abdullayevə həyatından keçən varlıqların hamısından ən əziz tar olub. Tar onun həyatında müstəsna yer tutub. O, sinəsinə sıxdığı tarı özünə doğma sayıb, yaxşılı-yamanlı günlərinin sadiq sirdaşı hesab edib.
"Ağasəlim Abdullayev 70 ilə yaxındır ki, tarı duyaraq çalır. O, ilk gənclik illərindən bugünədən tarın şöhrətini, şərəfini həmişə ləyaqətlə qoruyub, onu yad nəfəslərdən, kənar təmayüllərdən uzaqda saxlamağı bacarıb. Tar Ağasəlim Abdullayevə Şəhriyara olduğundan da, tar çalanlardan da daha yaxın olub", - deyə akademik Rafael Hüseynov əlavə edib.
Bildirilib ki, Ağasəlim Abdullayev 1970-ci ildən Azərbaycan Dövlət Televiziya və Radio Verilişləri Komitəsinin S.Rüstəmov adına xalq çalğı alətləri orkestrinin solisti, B.Salahovun rəhbərlik etdiyi Xalq çalğı alətləri ansamblının konsertmeysteri, 1982-ci ildən B.Salahov adına “Araz” Xalq çalğı alətləri ansamblının rəhbəridir. 2000-ci ildən Azərbaycan Milli Konservatoriyasının dosenti olub. Repertuarında “Bayatı-Şiraz”, “Rast”, “Xaric Segah”, “Şüştər”, “Şahnaz” və s. muğamlar əsas yer tutur.
Diqqətə çatdırılıb ki, Xalq artisti Ağasəlim Abdullayevin adı Azərbaycan xalqının qəlbində sevimli yer tutmaqdadır. Onun adı tara ömrünü vermiş seçkinlərin sırasındadır.
© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.
Akademik Rafael Hüseynovun təqdimatında “Axşam görüşləri” proqramının növbəti buraxılışı yayımlanıb
Okt 20, 2025 | 10:59 / Müsahibələr, çıxışlar
