Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialında Azərbaycanın ilk milli mətbu orqanı olan “Əkinçi” qəzetinin nəşrə başlamasının 150 illiyi münasibətilə yubiley tədbiri keçirilib.
Tədbirdə rayon ictimaiyyəti, ziyalılar iştirak ediblər.
Tədbiri muzeyin Aran Regional filialının müdiri filologiya üzrə fəlsəfə doktoru Yaqut Bahadurqızı açaraq “Konstitusiya və Suverenlik İli”ndə Azərbaycan milli mətbuatının 150 illik yubileyinin geniş şəkildə qeyd olunmasının tarixi əhəmiyyət daşımasından, müstəqil dövlət qurmaq və ədalətli cəmiyyət formalaşdırmaq ideyasının tarixən xalqımızın başlıca məqsədlərindən biri olmasından, bu yüksək məqsədlərin həyata keçirilməsində böyük şəxsiyyət Həsən bəy Zərdabinin 1875-ci il iyulun 22-də əsasını qoyduğu “Əkinçi” qəzeti ilə başlayan milli mətbuatımızın maarifçilik ideyalarının yayılmasında və ictimai düşüncənin inkişafında müstəsna rolundan danışıb.
Sonra Aran filialının elmi işçisi Ülviyyə Yusifova “Həsən bəy Zərdabi-maarifpərvər millət fədaisi” adlı məruzə ilə çıxış edərək Həsən bəy Zərdabinin Azərbaycan mətbuatının banisi kimi xalqın maariflənməsi və milli dirçəlişində oynadığı əvəzsiz xidmətlərdən bəhs edib. ÜlviyyəYusifova vurğulayıb ki, Zərdabi bütün ömrünü cəhalətlə mübarizəyə, elm və bilik işığının yayılmasına həsr edib. Həsən bəyin yaratdığı “Əkinçi” qəzeti o dövrün ziyalı düşüncəsinin formalaşmasında mühüm mərhələ olub və Zərdabinin fədakar fəaliyyəti, xalqına sevgisi və əqidəsinə sadiqliyi bu gün də hər bir azərbaycanlı üçün örnək olaraq qalır.
Tədbirdə yazıçı-jurnalist Tofiq Abdullayev, kitabxanaçı Müşgünaz Əliyeva, tarixçi Zeynal Səfərov, rayon ziyalısı Namiq Ağayev mövzu ətrafında çıxış edərək bildiriblər ki, Ulu Öndər Heydər Əliyevin müdrik siyasətini və dövlətçilik ənənələrini uğurla davam etdirən ölkə Prezidenti İlham Əliyev medianın inkişafını dövlət siyasətinin prioritet istiqamətlərindən biri kimi müəyyən edib. Dövlət rəhbərinin təşəbbüsü ilə ölkəmizdə medianın azad və sərbəst fəaliyyəti üçün əlverişli şərait yaradılıb, bu sahənin maddi-təşkilati və hüquqi bazasının möhkəmləndirilməsi, Medianın İnkişafı Agentliyinin təsis edilməsi, “Media haqqında” qanun qəbul olunması, jurnalistlərin sosial məsələlərinə olan diqqətin artırılması və onların rifah halının yaxşılaşdırılması üçün davamlı tədbirlər görülür.

Tədbirdə “Əkinçi” qəzetinin yaranma tarixi, məqsədi və ictimai əhəmiyyəti barədə hazırlanmış videoçarxlar nümayiş etdirilib. Videoçarxlarda Həsən bəy Zərdabinin həyat yolunun, onun maarifçi ideyalarının və qəzetin təkamül yolunun əyani şəkildə əks etdirilməsi tamaşaçıların marağına səbəb olub.
“Əkinçi” qəzetinin irsi bu gün də müasir Azərbaycan mediası üçün örnək və ilham mənbəyidir. Yubiley tədbiri yalnız bir keçmişin xatırlanması deyil, həm də gələcək nəslin milli kimlik, jurnalistika və maarifçilik kimi dəyərlərlə yetişdirilməsinin vacibliyini bir daha yada salıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.