Tacikistan Respublikasının Azərbaycan Respublikasında fövqəladə və səlahiyyətli səfiri  İlxom Abduraxmon, Tacikistan Milli Muzeyinin direktor müavini Naimzoda Dilorom və səfirliyin bir qrup əməkdaşı Nizami Gəncəvi adına Mili Azərbaycan Ədəbiyyatı Muzeyini ziyarət ediblər.

Tacikistan Respublikasının rəsmi qonaqları əvvəlcə muzey ekspozisiyası ilə tanış olublar. Ekskursiyanı muzeyin böyük elmi işçisi, filologiya üzrə fəlsəfə doktoru Gülnar Əqiq apararaq, eksponatlar barədə onlara ətraflı məlumat verib.

Muzeydə sərgilənən nadir incəsənət nümunələri, süjetli xalçalar, rəsm əsərləri, xüsusilə də Azərbaycan ədəbiyyatının görkəmli nümayəndələrinə həsr olunmuş sənətkarlıqla yaradılmış portretlər, miniatürlər və illüstrasiyalar qonaqların xüsusi marağına səbəb olub.

Muzey ekspozisiyası ilə tanışlıqdan sonra qonaqlar Azərbaycan Respublikası Milli Məclisinin sədr müavini, Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovla görüşüblər.

Görüş zamanı akademik Rafael Hüseynov Azərbaycan və Tacikistan Respublikası arasında əlaqələrin ölkəmiz üçün xüsusi əhəmiyyət daşıdığını vurğulayıb. O, Azərbaycan və tacik xalqları arasında tarixi və mədəni bağlılıqların qədim köklərə malik olduğunu, son dövrlərdə isə bu münasibətlərin daha da möhkəmlənərək strateji tərəfdaşlıq səviyyəsinə yüksəldiyini bildirib. Qeyd edib ki, 1992-ci ildə əsası qoyulmuş Azərbaycan-Tacikistan diplomatik əlaqələru 2007-ci ildə Azərbaycan Respublikasının Düşənbədə, 2008-ci ildə isə Tacikistan Respublikasının Bakıda səfirliklərinin açılması ilə daha da inkişaf edib. Ötən onilliklər ərzində Azərbaycan və tacik xalqları arasında dostluq və əməkdaşlıq əlaqələri dövlət başçılarının və rəsmi hökumət nümayəndələrinin qarşılıqlı səfərləri ilə də müşayiət olunub, Azərbaycan Prezidenti İlham Əliyev və Tacikistan Respublikasının Prezidenti Emomali Rahmon arasında dəfələrlə rəsmi və işgüzar görüşlər keçirilib, bu görüşlərin nəticəsində ölkələrimiz arasında Strateji Tərəfdaşlıq Bəyannaməsi və onlarla mühüm sənədlər imzalanıb.

Akademik Rafael Hüseynov 23 may 2024-cü il tarixində Prezident İlham Əliyevin Tacikistan Respublikasının Prezidenti Emomali Rahmonun Azərbaycana rəsmi səfəri ilə əlaqədar mətbuata bəyanatla çıxış edərkən söylədiyi - “Dövlətlərarası münasibətlərimiz ən yüksək səviyyəyə çatmışdır, qarşılıqlı fəaliyyətimizin əsasında çoxəsrlik tarix boyu əməkdaşlıq etmiş, dost olmuş, birlikdə qurub-yaratmış xalqlarımızın iradəsi dayanır", - sözlərini xatırladıb.

O, qonaqlara Nizami Gəncəvi adına Azərbaycan Ədəbiyyatı Muzeyinin əzəmətli binası haqqında da məlumat verərək bildirib ki, muzeyin ən möhtəşəm salonu Azərbaycan Demokratik Cümhuriyyətinin şərəfinə “İstiqlal” adını daşıyır. Muzeyin ekspozisiyası təkcə Azərbaycan ədəbiyyatının zəngin və qədim mədəniyyətini əks etdirmir, eyni zamanda, xalqımızın milli kimliyinin dünyada tanınması baxımından da xüsusi əhəmiyyət kəsb edir.

Sonra Tacikistan Respublikasının ölkəmizdəki səfiri  İlxom Abduraxmon akademik Rafael Hüseynova səmimi görüş üçün təşəkkür edib. O, iki ölkə arasında dostluq münasibətlərinin bu yaxınlarda Azərbaycan və Tacikistan Respublikası arasında parlamentlərarası işçi qrupunun yaradılması ilə daha geniş vüsət aldığını vurğulayıb.

Tacikistan Milli Muzeyinin direktor müavini Naimzoda Dilorom isə muzey ekspozisiyasını gəzərək Azərbaycan xalqının zəngin ədəbiyyatı və mədəni abidələri  ilə tanışlıqdan böyük zövq aldığını bildirib. 

Akademik Rafael Hüseynov müəllifi olduğu "Şirvan şairləri", "Sabirin saatı" kitablarının ingilis dilində nüsxələrini, muzeyin nəşrlərindən olan "Mixaylo" və "Nizami Muzeyinin xalçaları" bukletlərini qonaqlara hədiyyə edib. Qonaqlar da klassik tacik ədəbiyyatı və mədəniyyəti ilə bağlı kitab və albomları Rafael Hüseynova təqdim ediblər.  

Muzeyi ziyarət etməkdən zövq alan qonaqlar öz təəssüratlarını muzeyin rəy kitabına yazdıqları xoş sözlərlə ifadə ediblər.

Sonda qonaqlarla xatirə şəkilləri çəkilib. 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.