Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında yayımlanan proqram Azərbaycanın düşüncə və ziyalılıq tarixində həmişəlik yaşayacaq filosof, tənqidçi Asif Ataya həsr olunub.

Akademik Rafael Hüseynov bildirib ki, Asif Ata (Əfəndiyev) universitetdə dərs deyib, Azərbaycan Televiziyasında verilişlər aparıb, ən müxtəlif ədəbi mərasimlərdə çıxış edib. Asif Ata yazılarında, danışıqlarında heç kəsə bənzəməyib, onun dedikləri təzə, lakin dediklərinin məğzində dayananlar köhnə idi.

"Asif Atadan yadigar qalan, saf mənəviyyata köklənən əsərlər heç zaman köhnəlməyəcək", - deyən akademik Rafael Hüseynov qeyd edib ki, Asif Ata dünyada, həyatda, xalqımızda ölməz ənənələrə, ali mənəvi sərvətlərə sönməz məhəbbətin yaşadığına inanırdı. O, dünyanın və insanın tarixini gözəl öyrənmişdi. Asif Atanın oxuduqlarından gəldiyi başlıca qənaət ondan ibarət idi ki, insan öz böyüklüyünə qayıda bilər və ocaq bu ümumbəşəri tarixi vəzifəyə xidmət edir. Asif Ata azad düşünürdü, işığına toplananlara da fərqli və azad düşünməyi öyrədirdi.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.