Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında yayımlanan proqram tarzən Abdulla Qurbaniyə həsr olunub.

Abdulla Qurbaninin ömür yoluna nəzər salan akademik Rafael Hüseynov qeyd edib ki, o, 1954-cü ildə Tehranda anadan olub, ailəsi ilə birlikdə Bakıya köçüb. Asəf Zeynallı adına musiqi məktəbinin tar sinfini bitirən Abdulla Qurbani daha sonra Üzeyir Hacıbəyov adına Azərbaycan dövlət konservatoriyasından məzun olub. Bir müddət Almaniyada yaşayan tarzən 1988-ci ildən bəri Türkiyə Mədəniyyət və Turizm Nazirliyində çalışır.

Akademik Rafael Hüseynov bildirib ki, tarı uşaqlıqdan sevən Abdulla Qurbani üçün tar onun ömrünün mənasıdır. O, ürəyini bağladığı tarla daimi yol yoldaşlığı edir, hər gün birgədir, həmsöhbətdir.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.