Azərbaycan Televiziyasında "Millət təqvimi" verilişinin Bakıda açılmış ilk dünyəvi qızlar məktəbinə həsr olunmuş ikinci buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedən verilişdə Azərbaycanın maarifçilik tarixində, dünyəvi təhsilin inkişafında, Azərbaycan qadınının təhsil almasında böyük rol oynamış qızlar məktəbinin yerləşdiyi binadan, orada çalışmış görkəmli şəxsiyyətlərdən bəhs olunub. Bildirilib ki, görkəmli mesenat Hacı Zeynalabdin Tağıyevin təşəbbüsü və dəstəyi ilə Bakıda açılmış ilk dünyəvi qızlar məktəbi qız təhsilinin quruculuğu baxımından qığılcıma çevrilib. Bu məktəb 20-ci əsr müsəlman Şərq təhsil tarixində çevrilişə səbəb olub.

Diqqətə çatdırılıb ki, XX əsrin əvvəllərində - 7  oktyabr 1901-ci ildə  Bakıda  fəaliyyətə başlayan qızlar məktəbi tezliklə  məşhurlaşmağa başlayıb. Məktəbin açılışı günü Bakıya Rusiya müsəlmanlarından, dini idarə rəhbərlərindən onlarla təbrik teleqramı gəlib. Qonşu ölkələrin dövlət başçıları, ömrünü məktəb və maarif işinə həsr edən ziyalılar bu məktəbin uğurları ilə tanış olmaq istəyiblər. 

Akademik Rafael Hüseynov 1902-ci ilın sentyabrında İran şahı Müzəffərəddin şahın Avropa  səfərindən  öz ölkəsinə qayıdarkən zövcəsi ilə bərabər yolüstü  Hacı Zeynalabdin Tağıyevin müşayiəti ilə qızlar məktəbinə gəlişi barədə də məlumat verib. Qeyd edib ki, məktəb şahın  çox xoşuna gəlib və o, bir saatdan çox müddətdə məktəbin fəaliyyəti ilə tanış olub. Şah burada oxuyan qızların hərəsinə hədiyyə olaraq medalyonlu qızıl zəncir bağışlayıb. Heç kəsə borclu olmaq istəməyən H.Z.Tağıyev 1902-ci il noyabrın 13-də Bakı quberniyası  və Dağıstan Xalq Məktəbləri İdarəsinin  direktoruna rəsmi şəkildə  müraciət edərək, ona məxsus olan Əhmədli Lifli Materiallar Zavodunun fəhlələrinin uşaqlarının yaxşı təhsil almaları, cəmiyyət üçun faydalı vətəndaş olmaları üçün Əhmədli kəndində ibtidai məktəb açmasına icazə istəyib və bu məktubunda məktəbə İran şahı Müzəffərəddin şahın adının verilməsini xahiş edib.

Bildirilib ki, qızlar məktəbinin direktoru Azərbaycanın ilk maarifçi qadınlarından olan Hənifə Məlikova-Zərdabi olub. Əvvəllər burada 5 qadın müəllimə çalışıb, sonradan isə müəllimlərin sırasına kişi müəllimləri də əlavə edilib. Məktəbin içərisində xəstəxana da faəliyyət göstərib, burada təhsil alan və qalan qızlara məxsusi qayğı ilə yanaşılıb.

Arxiv materialları əsasında hazırlanmış verilişdə görkəmli ictimai-siyasi xadim, alovlu vətənpərvər və sədaqətli dövlət adamı, Azərbaycan Xalq Cümhuriyyəti dönəmində ilk milli parlamentimizin birinci rəhbəri Həsən bəy Ağayevin  Qızlar Məktəbində həkimlik fəaliyyətindən, burada gələcək həyat yoldaşı Xədicə xanımla tanışlığından bəhs olunub.

"Millət təqvimi"ni buradan izləyə bilərsiz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.