Azərbaycan Radiosunda “Axşam görüşləri” proqramının tarzən Abdulla Qurbaniyə həsr olunan ikinci buraxılışı yayımlanıb.

Proqram Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedib.

“Axşam görüşləri”ndə Abdulla Qurbaninin 1970-ci illərin başlanğıcında Flarmoniya çayxanasına gəlişi, buraya mütəmadi yığışan qələm əhli, musiqiçilər, şair və yazıçılarla söhbətlərindən bəhs olunub. 

Akademik Rafael Hüseynov bildirib ki, o zamanlar məxsusi məktəb sayılan Flarmoniya çayxanasında musiqimizin yaxın 100 il içərisindəki tarixi, musiqiçilərimizin sərgüzəştləri, sənət aləminin heç bir kitabda olmayan maraqlı əhvalatları müzakirə olunub. Hətta musiqiçi dəstəsini toy məclisinə dəvət etmək istəyənlər yaxşıların ən yaxşısını həmin çayxanadan tapıb, razılığa gəliblər: "Abdulla Qurbani indi ömrünün ahıl çağında da xatirələr cığırı ilə tez-tez həmin günlərə qayıdır, o insanları, dinlədiyi sərgüzəştləri, şahidi olduğu söhbətləri ömrünün ən əziz səhifələri kimi yada salır".

Qeyd olunub ki, Abdulla Qurbani söz və səs tariximizdə əbədi qalacaq Bəhram Mənsurov, Həbib Bayramov, Sərvər İbrahimov, Əliağa Quliyev, Əhsən Dadaşov, Ramiz Quliyev kimi sənətkarlarla yaxın olub, onlardan həmişə öyrənib. Görkəmli sənətkarlar da Abdulla Qurbaninin ifasına yüksək qiymət veriblər. Bundan başqa, o, illər boyu Rübabə Muradova, Qulu Əsgərov, Şövkət Ələkbərova, Arif Babayev, Elmira Rəhimova, Qədir Rüstəmov kimi sanballı sənətkarlarla eyni səhnədə olub, onları sədəfli tarı ilə müşayiət edib.

Abdulla Qurbaninin elmlə də məşğul olduğunu söyləyən akademik Rafael Hüseynov onun araşdırmalar apardığını, tədqiqat əsərləri yazdığını, dissertasiya müdafiə etmək əzmində olduğunu diqqətə çatdırıb. Bildirib ki, Abdulla Qurbaninin həyatda ən dəyişməz sevdası həmişə tar olaraq qalıb.

“Axşam görüşləri”ndə, həmçinin Abdulla Qurbaninin Azərbaycanla bağlı söylədiyi dəyərli fikirlər səsləndirilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.