18 noyabr 2025-ci il tarixdə Bakı Şəhər Mədəniyyət Baş İdarəsinin təşkilatçılığı ilə Səbail Rayon Mərkəzləşdirilmiş Kitabxana Sisteminin Mərkəzi kitabxanasında Azərbaycan ədəbiyyatının görkəmli nümayəndəsi, qüdrətli şair və böyük maarif xadimi Seyid Əzim Şirvaninin  anadan olmasının 190-cı ildönümünə həsr olunmuş “Şamaxıdan doğan günəş” adlı tədbir keçirilib.

İlk olaraq tədbirin böyük Azərbaycan şairi Seyid Əzim Şirvaninin 190 illiyinin qeyd olunması haqqında Azərbaycan Respublikası Prezidentinin 04 aprel 2025-ci il tarixli Sərəncamı ilə əlaqədar keçirildiyi bildirildi.

Tədbirdə Səbail rayon MKS-nin direktoru Nərmin Xəlilova, Seyid Əzim Şirvani irsinin tədqiqatçısı, AMEA Nizami adına Ədəbiyyat İnstitutunun aparıcı elmi işçisi, filologiya üzrə fəlsəfə doktoru Mətanət Vahid, Milli Azərbaycan Tarixi Muzeyinin aparıcı elmi işçisi, tarix üzrə fəlsəfə doktoru Əli Fərhadov, Səbail rayonu 189-190 nömrəli orta məktəbin Azərbaycan dili və ədəbiyyat müəllimi Səadət Budaqova və kitabxana əməkdaşları iştirak ediblər.

Tədbirdə əvvəlcə şairin ömür  yoluna həsr olunmuş videoçarx nümayiş etdirilib. Sonra iştirakçılar Seyid Əzim Şirvaninin həm bədii yaradıcılıq, həm də pedoqoji-maarifçilik fəaliyyəti ilə bağlı məruzələrlə çıxış ediblər.

Nizami Gəncəvi adına Milli Azərbaycan Ədəbiyyatı Muzeyinin “Beynəlxalq əlaqələr və dünya muzeyləri” şöbəsinin böyük elmi işçisi, filologiya üzrə fəlsəfə doktoru Gülnar Əqiq  tədbirdə Seyid Əzim Şirvaninin lirikası haqqında məruzə edib. Məruzəçi qeyd edib ki, Seyid Əzim Şirvani yaradıcılığının mərkəzində lirika, xüsusilə də qəzəl janrı dayanır. Şair qəsidə, müxəmməs, mürəbbe, tərkibbənd, tərcibənd, rübai və digər klassik şeir növlərində nümunələr yaratmış olsa da, həm həcm, həm də bədii-estetik baxımından onun poeziyasında qəzəl üstün mövqeyə malikdir. O, vurğulayıb ki, Seyid Əzim lirikasının formalaşmasında klassik Şərq poeziyasının aparıcı nümayəndələrinin – Firdovsi, Xaqani, Nizami, Sədi, Hafiz, Rumi, Xəyyam, Cami, Nəvai və xüsusilə də böyük sələfi Məhəmməd Füzulinin yaradıcılığı mühüm təsir mənbələrindən olmuş və bu təsir Seyid Əzim Şirvaninin əsərlərinin həm ideya-məzmun, həm də bədii sənətkarlıq xüsusiyyətlərində özünü qabarıq şəkildə büruzə vermişdir.

Tədbir çıxışçıların və dinləyicilərin sual-cavabları əsasında müzakirələrlə davam edib.

Səbail rayon MKS-nin direktoru Nərmin Xəlilova tədbirin sonunda görkəmli Azərbaycan şairi və maaarifçisi Seyid Əzim Şirvaninin ədəbi-bədii irsinin öyrənilməsinin bu günkü gənc nəsil üçün də vacib olduğunu qeyd edərək bütün iştirakçılara maraqlı çıxışlarına görə minnətdarlığını bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.