Nizami Gəncəvi adına Milli Azərbaycan Ədəbiyyatı Muzeyində növbəti elmi seminar məşğələsi baş tutub.

Tədbirdə muzeyin Mədəni irs və mənbəşünaslıq şöbəsinin böyük elmi işçisi, filologiya üzrə fəlsəfə doktoru, dosent Faiq Əliyev XII əsr ədəbiyyatının qüdrətli filosof şairlərindən olmuş Əfzələddin Xaqani Şirvani haqqında məruzə edib.

Şairin həyat yolu, ailəsi, özünəxas dünyagörüşü haqqında məlumatları diqqətə çatdıran alim, bu barədə indiyədək yazılmış təhrif və yanlışlıqları da vurğulayıb. Xaqaninin əsasən “Töhfətül- İraqeyn” əsərinin forma və məzmun xüsusiyyətlərindən bəhs edən Faiq Əliyev buradakı başlıqların şairin özü tərəfindən deyil, sonradan əlavə edildiyini söyləyib.

Məruzəçi qeyd edib ki, 1152-1153-cü illərdə İraqa ilk səfərindən Şirvana qayıtdıqdan sonra Xaqani əsərinə əlavələr edib, məsnəvinin adını dəyişərək “Xatirələr töhfəsi və gördüklərimdən seçmələr” kimi adlandırıb.

Elmi seminar məşğələsi muzeyin Mədəni irs və mənbəşünaslıq şöbəsinin müdiri, prof. Xatirə Bəşirli, Beynəlxalq əlaqələr və dünya muzeyləri şöbəsinin böyük elmi işçisi, fil.ü.f.d. Gülnar Əqiq, həmin şöbənin kiçik elmi işçisi Şəfəq Nağıyeva, Doktorantura və elmi inkişaf şöbəsinin müdiri, fil.ü.f.d. Cəmilə Dəmirova, Məktəblərlə və ictimaiyyətlə iş şöbəsinin müdiri, fil.ü.f.d. Nəzmiyyə Yigitoğlu və digərlərinin sual və çıxışları ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.