Dini Qurumlarla İş üzrə Dövlət Komitəsinin tabeliyində fəaliyyət göstərən Azərbaycan İlahiyyat İnstitutunun və Bakı İlahiyyat Kollecinin tələbələri Nizami Gəncəvi adına Milli Azərbaycan Ədəbiyyatı Muzeyində qonaq olublar. Ziyarətin məqsədi tələbələrin Azərbaycan ədəbi-mədəni irsi, klassik poeziya ənənələri və Nizami Gəncəvinin yaradıcılığı haqqında biliklərini yeniləmək, həmçinin muzey mühitində interaktiv öyrənmə imkanlarını genişləndirmək olub.

Muzeyin böyük elmi işçisi, filologiya üzrə fəlsəfə doktoru Sevinc Heydərova və elmi işçi Aysel Məhərrəmova nadir eksponatlar, əlyazma nüsxələri, miniatür nümunələri və müxtəlif dövrlərə aid ədəbi irsi əks etdirən materiallar haqqında tələbələrə məlumat veriblər. 

Daha sonra tələbələrə klassik ədəbiyyatın inkişaf mərhələləri, Azərbaycan ədəbi şəxsiyyətləri və onların Şərq mədəniyyətinə təsiri barədə söz açıblar.

Ziyarətin sonunda Bakı İlahiyyat Kollecinin tədris hissə müdiri Hilalə İbadova təqdim olunan zəngin ədəbi mühitdən böyük zövq aldıqlarını və belə görüşlərin gənclərin dünyagörüşünün formalaşmasında, milli-mənəvi dəyərlərin daha dərindən mənimsənilməsində əhəmiyyətli rol oynadığını vurğulayıb. 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.