Türkiyə Cümhuriyyəti TRT Ankara Radiosu “Türk Halk Müzigi – Kafkas Esintisi” proqramının rejissoru İrem Çetinkol Nizami Gəncəvi adına Mili Azərbaycan Ədəbiyyatı Muzeyinin qonağı olub.

Qonağı muzey ekspozisiyası ilə muzeyin Beynəlxalq əlaqələr və dünya muzeyləri”şöbəsinin böyük elmi işçisi, filologiya üzrə fəlsəfə doktoru Gülnar Əqiq tanış edərək  qədim və çağdaş Azərbaycan ədəbiyyatı haqqında məlumat verib. Muzeydə orijinal incəsənət əsərləri ilə yanaşı, Azərbaycan ədəbiyyatının məşhur  simalarına aid musiqi alətlərinin də nümayiş etdirilməsi İrem Çetinkolun diqqət və marağına səbəb olub. O, rejissoru olduğu “Türk Halk Müzigi – Kafkas Esintisi” proqramının Qafqazda yaşayan xalqların mədəni ənənələri ilə bağlı olduğunu bildirərək həmin proqram vasitəsilə tez-tez Azərbaycan xalq musiqisinin və bəstəkar əsərlərinin də səsləndirildiyini qeyd edib, Üzeyir Hacıbəyli, Bülbül, Fikrət Əmirov kimi dünya şöhrətli musiqiçilərin yaradıcılığına müraciət edildiyini vurğulayıb.

Muzeyi ziyarət etməkdən zövq aldığını bidirən qonaq Azərbaycan xalqının zəngin tarixini, ədəbiyyat və mədəniyyətini təmsil edən belə bir sənət ocağının qurulmasında əməyi olanlara, o cümlədən muzey rəhbərliyinə öz minnətdarlığını muzeyin rəy kitabına yazdığı xoş sözlərlə ifadə edib. İrem Çetinkol qeyd edib ki, Azərbaycan Qafqazların incisi, ədəbiyyat, şeir və musiqinin parlayan ulduzu, ədəbiyyat muzeyi isə Azərbaycan ədəbiyyatının simvoludur.

Sonda qonağa muzeyin direktoru, Milli Məclisin sədr müavini, akademik Rafael Hüseynovun müəllfi olduğu “Söz məbədi” buklet-albomu hədiyyə edilib və xatirə fotoşəkilləri çəkilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.