Azərbaycan Radiosunda “Axşam görüşləri” proqramının Xalq artisti, professor Tofiq Bakıxanovun 95 illik yubileyinə həsr olunan birinci hissəsi yayımlanıb.

Proqram Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedib.

“Axşam görüşləri”ndə professor Tofiq Bakıxanovun şəcərəsi, yaradıcılığı, bəstəkarlıq irsindən geniş bəhs olunub.

Akademik Rafael Hüseynov bildirib ki, Tofiq Bakıxanov yaradıcı ömrü boyu ifaçı, bəstəkar, müəllim, naşir, təşkilatçı kimi Azərbaycan mədəniyyətinə böyük töhfələr verib. Qara Qarayevin, Üzeyir Hacıbəyli kimi dahilərin tələbəsi olan Tofiq Bakıxanovun adının qarşısındakı “Xalq artisti” ifadəsi rəsmi dəyərləndirmədən daha əvvəl, onun Azərbaycan gerçəkliyində 80 ilə çatan şərəfli yaradıcılıq yolunu ifadə etməkdədir.

Diqqətə çatdırılıb ki, böyük sənətə aparan yolunu dahi Üzeyir Hacıbəylinin bələdçiliyi ilə skripkaçı kimi başlayan Tofiq Bakıxanov ömrü boyu ustadının və soyadının ona həvalə etdiyi vəzifələrə və meyarlara sadiq qalıb.

"Üzeyir Hacıbəylinin 60 illik yubileyi mərasimində 1948-ci ildə səhnəyə çıxamlardan biri də Tofiq Bakıxanov olub və o, ustadını "Arşın mal alan"dan skripkada ifa etdiyi "Fantasiya" ilə salamlayıb", - deyən akademik Rafael Hüseynov Tofiq Bakıxanovun Azərbaycan Dövlət Konservatoriyasında Üzeyir Hacıbəylinin adına təsis olunmuş təqaüdə layiq görülən ilk tələbə olduğunu bildirib. O, Xalq artisti Tofiq Bakıxanovun 1940-ci illərin başlanğıcında, yeniyetmə çağlarındakı kimi, indi də eyni şövqlə yaşamaqda və yaratmaqda olduğunu söyləyib.

Diqqətə çatdırılıb ki, Tofiq Bakıxanovun şəxsiyyəti və yaradıcılığı ilə bu millətə başqa töhfəsi isə onun 100 yaşına doğru aydın zəka, dəmir hafizə, zəhmətdən yorulmamaq eşqi və yeni gözəl bəhrələrlə irəliləməsidir. O, 1930-cu illərdən bu yana mədəniyyət həyatımızdakı ən etibarlı körpüdür. Tofiq Bakıxanovun yaddaşında sayrışan xatirələr sayəsində dünənimizin, mədəni həyatımızın çox hadisələrini daha aydınlığı ilə görə bilir, böyük şəxsiyyətlərimizin yaradıcılıq yolunun neçə incə məqamına baxa bilirik. O, yalnız yaratdığı gözəl əsərlərlə deyil, körpü olmaqla da xidmətlərini davam etdirir. 

Proqramda Xalq artisti Tofiq Bakıxanov görkəmli şəxsiyyətlərlə olan söhbətlərini, xatirələrini bölüşüb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.