Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialı tərəfindən Kürdəmir rayonun Atakişili kənd orta məktəbində klassik Şərq poeziyasının böyük nümayəndəsi, XIX əsr maarifçilik ideyalarının ən böyük təbliğatçısı Seyid Əzim Şirvaninin 190 illiyinə həsr olunan ədəbi-bədii məclis keçirilib.

Tədbirin aparıcısı Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynov qüdrətli şair və böyük maarifçi Seyid Əzim Şirvaninin həyat və yaradıcılığından bəhs edib. O, daha çox Füzulidən qaynaqlanan şairin klassik şeirin bütün janrlarında – qəzəl, qəsidə, fəxriyyə, müxəmməs, müstəzad, müsəddəs, rübai və s. növündə əsərlər yazdığını, mövzu etibari ilə maarifçiliyə, elmə üstünlük verdiyini, onun lirik, romantik əsərlərində də realizmin üstünlük təşkil etdiyini söyləyib.
Sonra muzeyin Aran filialının müdiri filologiya üzrə fəlsəfə doktoru, dosent Yaqut Bahadurqızı çıxış edərək XIX əsrdə Azərbaycanın hər səmtində - Gəncədə, Qubada, Naxçıvanda, Lənkəranda, Qarabağda, Bakıda yaranan ədəbi məclislərdən, xüsusilə bu məclislərin ən sanmballısı, tərkibcə ən mötəbəri olan Şamaxıda Seyid Əzim Şirvaninin açdığı “Beyt üs-səfa” məclisindən danışıb. Yaqut Bahadurqızı görkəmli şairin rəhbərlik etdiyi bu məclisdə ana dilindən başqa ərəb, fars, rus, fransız dillərində də nəsr, nəzm əsərləri yazan qələm sahiblərinin də olduğunu xüsusi vurğulayıb.

Daha sonra Seyid Əzim Şirvaninin həyat və yaradıcılığından bəhs edən videoçarx nümayiş etdirilib.

Mərasimdə “XIX əsr Şirvan ədəbi-mədəni mühiti: Seyid Əzim Şirvani və Mahmud ağa” mövzusunda məruzə ilə çıxış edən Azərbaycan Dövlət Pedaqoji Universitetinin Şamaxı filialının kafedra müdiri filologiya üzrə fəlsəfə doktoru Eyvaz Eminalıyev XIX əsr Şamaxı şairləri, Seyid Əzim Şirvaninin yaradıcılığı, “Beytüs-səfa” ədəbi məclisi, xeyriyyəçi, şair və muğam bilicisi Mahmud Ağanın bu sahədəki xidmətləri və S.Ə.Şirvani ilə ədəbi dostluq münasibətlərindən danışıb. 

Məclisin bədii hissəsində respublikanın tanınmış sənətçiləri - Əməkdar İncəsənət xadimi, xanəndə Hacı Aqil Məlikov, Əməkdar Mədəniyyət işçisi, Şirvan Aşıqlar Birliyinin sədri aşıq Ağamurad İsrafilov, xanəndə Hüseyn Məlikov, VIII Televiziya Muğam Müsabiqəsinin laureatı, “Muğam aləmi” Beynəlxalq Muğam müsabiqəsinin qalibi Daşqın Kürçaylı və  tarizən Adil Rəhimov çıxış ediblər.

Sonda Kürdəmir şəhər 3 saylı tam orta məktəbin şagirdləri Lamiyə Şahverdiyeva, Alisa İsmayılova, Zəhra Məmmədlinin ifasında şairin qəzəl və təmsillərindən nümunələr səsləndirilib.

Məclisin xoş ovqatı tamaşaçılara da siraət edib, zaldan da Seyid Əzim qəzəllərindən parçalar söylənilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.