Azərbaycan Radiosunda “Axşam görüşləri” proqramının Xalq artisti, professor Tofiq Bakıxanovun 95 illik yubileyinə həsr olunan ikinci hissəsi yayımlanıb.

Proqram Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedib.

Akademik Rafael Hüseynov bildirib ki, 1947-ci il sentyabrın 27-də Opera və Balet Teatrında Nizami Gəncəvinin müharibə ilə əlaqədar təxirə salınmış 800 illik yubiley tədbirində Tofiq Bakıxanov Belçika bəstəkarı Anri Vyotanın (1820–1881) “Skripka üçün konsert”ini ifa edib. Bir neçə gün sonra Tofiq qəbul imtahanlarını vermək üçün sənədlərini konservatoriyaya təqdim edəndə yubiley konsertindəki çıxışının mükafatını alır: "Tofiq Bakıxanova söyləyirlər ki, Üzeyir Hacıbəyli tapşırıb, sizi konservatoriyaya imtahansız götürürük. 1948-ci ilin noyabrında dahi bəstəkarın və əziz müəllimin vəfatından sonra təsis edilən “Üzeyir Hacıbəyov” təqaüdünə layiq görülən ilk tələbə də Tofiq Bakıxanov olub".

O, 2017-ci ilin aprelində AMEA Rəyasət Heyətinin iclasında adlı mükafatlara layiq görülən 7 nəfərin içərisində Tofiq Bakıxanovun da olduğunu diqqətə çatdırıb. Qeyd edib ki, professor Tofiq Bakıxanov Azərbaycan professional musiqi tarixi və nəzəriyyəsinin, dahi Azərbaycan bəstəkarı və musiqişünası Üzeyir Hacıbəyli irsinin tədqiqi sahəsində əldə etdiyi mühüm nailiyyətlərə görə AMEA-nın akademik Üzeyir Hacıbəyli adına mükafatına layiq görülüb. Həmçinin 1960-cı ildə “İkinci simfoniya”sını yazıb və Moskvada mükafata layiq görülüb.

Tofiq Bakıxanovun Azərbaycan Milli Konservatoriyasında görkəmli bəstəkar, Xalq artisti Qara Qarayevin sinfində oxuduğunu söyləyən akademik Rafael Hüseynov vurğulayıb ki, Azərbaycan musiqisinin canlı klassiklərindən olan Tofiq Bakıxanov şəxsiyyəti, təsirinin əhatəsi və işığı ilə yalnız övladı olduğu Bakıxanovlar nəslinin deyil, qırılmaz tellərlə bağlandığı digər şöhrətli nəsillərimizin də gözlərimiz önündəki rəmzi, örnəyi, dərslərindən öyrəniləsi və yaşam tərzindən ibrət götürüləsi təmsilçisidir. Onun musiqimizin ən müxtəlif forma və janrlarındakı çoxsaylı əsərləri – 8 simfoniyası, 6 simfonik poeması, 5 simfonik muğamı, 26 sonatası, müxtəlif musiqi alətləri üçün 26 konserti, 9 fuqası, 5 prelüdü, silsilə uşaq pyesləri, 100-dən artıq mahnı və romansı, 3 musiqili komediyası və digər bəstələri çoxrəngli, çoxçalarlı cazibədar bir palitra yaradır.

"Elə musiqi hadisələri var ki, onlar Azərbaycan bəstəçiliyində məhz Tofiq Bakıxanovun adı ilə bağlıdır. Sonata janrı musiqimizdə Tofiq müəlliməcən də vardı. Fəqət viola üçün sonataların ilklərini yaratmaq və bu janrın bəstəçiliyimizdə təkanvericisi olmaq şərəfi Tofiq Bakıxanova məxsusdur", - deyə akademik Rafael Hüseynov bildirib.

Diqqətə çatdırılıb ki, milli baletlər xəzinəmizə Tofiq Bakıxanov 3 töhfə verib. 1967-ci ildə bəstələnmiş və 1968-ci il yanvarın 14-də Opera və Balet Teatrımızda ilk nümayişi olmuş “Xəzər balladası”, onun ardınca gələn və görkəmli rus şairi Sergey Yeseninin “Fars motivləri” şeirlər silsiləsi əsasında yazdığı “Şərq poeması”, bir də artıq 1990-cı illərin lap başlanğıcında, Nizami Gəncəvinin anadan olmasının 850 illiyi münasibətilə araya-ərsəyə gətirdiyi “Xeyir və Şər” baletləri populyarlıqlarını heç zaman itirməyiblər.

Proqramda Xalq artisti Tofiq Bakıxanov Qara Qarayevlə olan söhbətlərini, xatirələrini bölüşüb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.