“Mədəniyyət” kanalında “Vətənim” verilişinin müasir müstəqil Azərbaycanın memarı və qurucusu, xalqımızın dahi oğlu və Ümummilli Lideri Heydər Əliyevin xatirəsinə həsr olunan xüsusi buraxılışı yayımlanıb.

Veriliş Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedib.

Akademik Rafael Hüseynov dahi şəxsiyyət, uzaqgörən lider, cəsarətli insan Heydər Əliyevin şərəfli və mənalı həyat yolundan, zəngin dövlətçilik irsindən bəhs edərək bildirib ki, bu gün Azərbaycanda ən çox abidəsi olan insan Ulu Öndər Heydər Əliyevdir. O, əməlləri ilə, seçilmiş izləri ilə tarixə imzasını vurub.

"Vətənim" verilişində dahi rəhbərin dövlət müstəqilliyinin qorunmasında, ölkəmizin hərtərəfli inkişafı yolunda böyük tarixi xidmətləri diqqətə çatdırılıb, Ümummilli Liderin ən ali amalının yurdunun müstəqilliyini, istiqlalını qorumaq olduğunu vurğulanıb.

Qeyd olunub ki, bütün varlığı ilə Vətəninə və xalqına bağlı olan Ulu Öndər öz həyatını, zəngin dövlətçilik təcrübəsini Azərbaycanın xoşbəxt gələcəyinə həsr edib. Əsrlər keçsə də, nəsillər dəyişsə də, Heydər Əliyevin əziz xatirəsi daim qəlblərdə yaşayacaq, yaddaşlardan heç vaxt silinməyəcək.

Ulu Öndərə həsr olunmuş buraxılışı buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.