Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında Azərbaycan Radiosunda “Axşam görüşləri” proqramının növbəti buraxılışı yayımlanıb.

Budəfəki proqramda Silahlı Qüvvələrin Hərbi Akademiyasının Adyunktura və elm şöbəsinin dosenti, professor Mehman Süleymanovun Azərbaycan dövlətçilik və hərb tarixi araşdırmalarından bəhs olunub.

Akademik Rafael Hüseynov bildirib ki, əslən Zərdabdan olan Mehman Süleymanov doğma yurda və millətə sonsuz sevgisini bugünədək sübut etməkdədir. O, bir sıra Vətən və millət kitablarının müəllifidir.

Uşaqlığı daha çox Ağdaşda keçən Mehman Süleymanovun Azərbaycan Dövlət Universitetinin Şərqşünaslıq fakültəsində təhsil aldığını deyən akademik Rafael Hüseynov onunla tələbəlik illərindəki tanışlığından danışıb. Qeyd edib ki, vaxtın gedişatı ordu işini Mehman Süleymanovun həyatının ayrılmaz parçasına çevirib. O, 1992-ci ildə Azərbaycan ordusu sıralarında xidmətə başlayıb. Bir müddət "Azərbaycan ordusu" qəzetində çalışıb, daha sonra fəaliyyətini Müdafiə Nazirliyinin Hərbi Elmi Mərkəzində davam etdirib.

"Mehman Süleymanov 1996-ci ildə milli tariximizdə bir ilkə imza atdı. O, Azərbaycan Respublikası Silahlı Qüvvələri tərkibində ilk dəfə "Azərbaycan Respublikası Silahlı Qüvvələrinin yaranması və inkişafı" mövzusunda namizədlik dissertasiyasını müdafiə edən alim oldu. 2004-cü ildə isə yenidən AR Silahlı Qüvvələri tərkibində ilk dəfə "Azərbaycan Xalq Cümhuriyyətinin hərb tarixi araşdırması" mövzusunda doktorluq dissertasiyasını müdafi etdi", - deyə akademik Rafael Hüseynov əlavə edib.

Onun sözlərinə görə, Mehman Süleymanov 2005-2015-ci illərdə Azərbaycan Respublikası Silahlı Qüvvələrinin İranda hərbi attaşesi vəzifəsində çalışıb, orada arxiv materiallarla, ilkin mənbələrlə işləyib. İki cildlik "Gülüstan müqaviləsi", "Türkmənçay müqaviləsi" və "Nadir şah" əsərlərini ərsəyə gətirib.

Akademik Rafael Hüseynov vurğulayıb ki, professor, polkovnik Mehman Süleymanovun qələmindən çıxan əsərlər hər bir azərbaycanlıya gərək olan və heç vaxt köhnəlməyəcək nəşrlərdir. Onun "Qafqaz İslam Ordusu və Azərbaycan", "Nuri Paşa və silahdaşları", iki cildlik "Azərbaycan Xalq Cümhuriyyətinin hərb tarixi", beş cildlik "Azərbaycan Ordusunun tarixi" və üç cildlik "Vətən müharibəsinin salnaməsi" əsərləri qiymətli mənbələrdir. Tarixə çıraq tutan Mehman Süleymanov şərəfli yolun yolçusudur.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.