Mədəniyyət kanalında “Vətənim” verilişinin İkinci Dünya müharibəsinin əfsanəvi qəhrəmanı, Sovet İttifaqı Qəhrəmanı Mehdi Hüseynzadəyə həsr olunan ilk buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedən verilişdə Mehdi Hüseynzadənin macəralı ömründən, bədii yaradıcılığından, şairlik fəaliyyətindən geniş bəhs olunub.

Akademik Rafael Hüseynov bildirib ki, İkinci Dünya müharibəsi tarixində xüsusi xidmətləri olan Mehdi Hüseynzadə həm də bir-birindən gözəl şeirlərin müəllifidir. Lakin onun adı Azərbaycan ədəbiyyatında, söz keçmişimizdə qalmayıb, bir çox şeirlərinin bizə gəlib çatması isə möcüzədir.

"Mehdi Hüseynzadəni Azərbaycanda hamı tanıyır, ölkəmizdən kənarlarda da adı məşhurdur. Onun şair olmasını isə az adam bilir", - deyən akademik Rafael Hüseynov əfsanəvi qəhrəmanın məktəb illərindən şeirlər yazmağa başladığını diqqətə çatdırıb. O, Mehdi Hüseynzadənin 1944-cü ildə Vətəndən uzaqlarda Bakı haqqında yazdığı şeiri səsləndirib. Qeyd edib ki, azərbaycanlı partizan Ömər Xəyyamın farsca rübaisi əsasında özünəməxsus tərzdə öz şeirini yazıb. 

Süleyman Sani Axundovun Mehdi Hüseynzadə ilə tanışlığından danışan akademik Rafael Hüseynov qeyd edib ki, o, Süleyman Sani Axundovun müdir olduğu yeddiillik məktəbdə oxuyub. İlk müəllimi sonralar məşhur bəstəkara çevrilən Səid Rüstəmov olub. Süleyman Sani Axundov Mehdi Hüseynzadəyə şeir həsr edib.

Vurğulanıb ki, milyonların qəlbinə həkk olunacaq şeir kimi ömür yaşayan Mehdi Hüseynzadənin şeirləri, yazdığı sətirlərdəki hisslər və həyəcan hər zaman diridir. 

Diqqətə çatdırılıb ki, əfsanəvi partizan Mehdi Hüseynzadə həm də istedadlı rəssam olub, 1932-ci ildə Bakı Rəssamlıq Məktəbinə daxil olub. Burada Kazım Kazımzadə, Əsgər Abbasov, Əli Zeynalov, Mürsəl Nəcəfov ilə birlikdə oxuyub. 

"Qeyri-adi istedada, yüksək əxlaqi və iradi keyfiyyətlərə malik həmvətənimiz başqa zamanda yaşasaydı Azərbaycanın ən tanınmış söz ustadlarından birinə çevrilə bilərdi, yaxud parlaq rəssam kimi tarixdə qalardı.

Akademik Rafael Hüseynov qeyd edib ki, mahir kəşfiyyatçı Mehdi Hüseynzadə “Sovet İttifaqı Qəhrəmanı” adına layiq görülən ən sonuncu qəhrəmandır. Ona "Qızıl ulduz" medalı dünyadan köçməsindən xeyli illər sonra, 1957-ci il aprelin 11-də SSRİ Ali Soveti Rəyasət Heyətinin Fərmanı ilə verilib.

Veriliş boyunca akademik Rafael Hüseynov azərbaycanlı qəhrəmanın şeirlərindən nümunələr səsləndirilib, Qədir Süleymanın Mehdi Hüseynzadə ilə bağlı ona danışdığı xatirələri diqqətə çatdırıb.

“Vətənim” verilişini buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.