Nizami Gəncəvi adına Milli Azərbaycan Ədəbiyyatı Muzeyində görkəmli Azərbaycan dramaturqu, maarifçi, yazıçı və pedaqoq Süleyman Sani Axundovun anadan olmasının 150 illik yubileyi münasibətilə növbəti elmi seminar məşğələsi keçirilib.

Seminarda muzeyin Doktorantura və elmi inkişaf şöbəsinin elmi işçisi, fil.ü.f.d.  Günel Səfərova “Uşaq ədəbiyyatının Süleyman Sani zirvəsi” mövzusnda məruzə ilə çıxış edib. G.Səfərova, Süleyman Sani Axundovun uşaqlar üçün qələmə aldığı hekayələrinin hər zaman tədqiqatçıların diqqət mərkəzində olduğunu qeyd edərək  müasir dövrdə də aktuallıq daşıdığını, bir çox ədəbiyyatşünas alimlərin, o cümlədən Aygün Bağırlının, Sərvanə Dağtumasın və Ədalət Rəsulovanın S.S.Axundovun yaradıcılığı üzərində tədqiqatlar apardığını vurğulayıb. O, S.S.Axundovun Azərbaycan uşaq ədəbiyyatına gətirdiyi əsas məzmun, janr və üslub yenilikləri sırasında realizm və həyat həqiqətlərinin açıq təsvirini, folklor formalarından realist məzmuna keçidi, əsərləri ilə  maarifçilik və sosial tənqidin, macəra-psixoloji hekayə janrınının təməlini qoymasını və uşaq psixologiyasını dərindən tədqiq etdiyini sadalayıb.

Məruzəçi qeyd etdi ki, Süleyman Sani Axundovun yaradıcılığında dərin psixologizm, həyat hadisələrinə realist münasibət və sosial tənqid mühüm yer tutur. Onun əsərlərində uşaqlar yalnız tərbiyə obyekti olan obrazlar kimi deyil, cəmiyyətin problemlərini duyub dərk edən şəxsiyyətlər kimi təqdim olunur. Bu baxımdan yazıçının “Qorxulu nağıllar” silsiləsi və “Qaraca qız” povesti həm mövzu aktuallığı, həm də bədii-estetik səviyyəsi ilə seçilərək Azərbaycan uşaq ədəbiyyatının klassik nümunələri sırasına daxil olmuşdur.

Günel Səfərova çıxışının yekununda Süleyman Sani Axundovun Azərbaycan uşaq ədəbiyyatının inkişaf tarixində yeni bir mərhələnin əsasını qoymuş görkəmli sənətkar olduğunu, uşaq ədəbiyyatını uzun müddət bu sahədə üstünlük təşkil etmiş folklor-didaktik çərçivədən çıxararaq realist-psixoloji istiqamətə yönəltdiyini, eyni zamanda mövzu və ideya baxımından zənginləşdirdiyini vurğuladı. O, qeyd etdi ki, görkəmli yazıçının əsərləri bu gün də öz ideya-bədii dəyərini qoruyub saxlayır, uşaqlarda humanizm, mərhəmət, ədalət və sosial məsuliyyət kimi keyfiyyətlərin formalaşmasında mühüm rol oynayır. Məhz bu xüsusiyyətlərinə görə Süleyman Sani Axundov haqlı olaraq Azərbaycan realist uşaq ədəbiyyatının banisi kimi dəyərləndirilir və onun irsi müasir ədəbi tənqid elminin aktual mövzusu kimi əhəmiyyət daşıyır.

Elmi seminar məşğələsində muzeyin Mədəni irs və mənbəşünaslıq şöbəsinin müdiri, prof. Xatirə Bəşirli çıxış edərək  Süleyman Sani Axundovun  bədii yaradıcılığının əsas qaynaqlarından birinin Azərbaycan şifahi xalq ədəbiyyatının, folklor ənənələrinin, xüsusilə nağılların olduğunu bildirib.

Tədbir muzeyin Mədəni irs və mənbəşünaslıq şöbəsinin böyük elmi işçisi, filologiya üzrə fəlsəfə doktoru, dosent Faiq Əliyev, Ekspozisiya şöbəsinin müdiri, Əməkdar mədəniyyət işçisi Tomiris Babanlı, Beynəlxalq əlaqələr və dünya muzeyləri şöbəsinin böyük elmi işçisi, fil.ü.f.d. Gülnar Əqiq, Doktorantura və elmi inkişaf şöbəsinin müdiri, fil.ü.f.d. Cəmilə Dəmirova və digər muzey əməkdaşlarının sual və çıxışları ilə davam edib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.