Nizami Gəncəvi adına Milli Azərbaycan Ədəbiyyatı Muzeyində növbəti elmi seminar məşğələsi keçirilib.

Muzeyin filiallarla iş üzrə direktor müavini Ləman Muxtarova XX əsr Azərbaycan nəsrinin yetirdiyi görkəmli simalardan olmuş xalq yazıçısı Yusif Səmədoğlu haqqında məruzə edib.

Yazıçının ədəbi irsi və ictimai-siyasi fəaliyyətindən bəhs edən məruzəçi qeyd edib ki, Yusif Səmədoğlu 16 hekayə və “Qətl günü” romanının müəllifidir. Daha sonra Ləman Muxtarova yazıçının “Xəzri”, “Güllər”, “220 nömrəli otaq” hekayələrini ideya-məzmununa görə təhlil edib.

Nasirin məşhur “Qətl günü” romanından da bəhs edən məruzəçi bildirib ki, əsərin süjeti müxtəlif tarixi dövrlərdə baş vermiş real və irreal hadisələrin bir-birinə keçidi ilə qurulub. Məruzəçi qeyd edib ki, yazıçının yenilikçi ədəbiyyatı əks etdirən yaradıcılığında həm dövrün çətin, keçilməz məhdudiyyətlərinin mənzərəsi, həm də bu dövrləri yaşamış insanın mənəvi-psixoloji aləmi ustalıqla ifadəsini tapır.

Yusif Səmədoğlunun həyat, yaradıcılıq yolunu işıqlandıran video çarxın da nümayiş olunduğu elmi seminar məşğələsi, muzey əməkdaşlarının sual və çıxışları ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.