Dekabrın 20-də İstanbul Apaçık radio kanalının qurucusu və aparıcısı Milad Bülənd Qılınc Nizami Gəncəvi adına Milli Azərbaycan Ədəbiyyatı Muzeyinin qonağı olub.

Ədəbiyyat, incəsənət və fars dilindən tərcümə sahəsində geniş fəaliyyət dairəsinə malik olan, öz radio kanalında müxtəlif bədii tərcümə əsərlərini səsləndirən  Milad bəy, bu yolla müxtəlif xalqların mədəniyyətini tanıdır.

Muzeyin "Beynəlxalq əlaqələr və dünya muzeyləri" şöbəsinin kiçik elmi işçisi Aysel Bayramova ilə birlikdə muzeyin geniş ekspozisiyası ilə tanış olduqdan sonra Milad Bülənd Qılınc muzeyin Rəylər kitabında öz təəssüratlarını paylaşıb:

“Həyat yoldaşımla birlikdə keçən il Nizami muzeyini gəzdik. Etiraf etməliyəm ki, o zaman bu muzeydə yer alan ədəbiyyatçıların çoxunu tanımırdıq. Lakin izahat verənlər o qədər maraqlı anlatdılar ki, Türkiyəyə dönəndə bu şairlərin bir çoxunu araşdırmaq ehtiyacı hiss etdim. Xüsusən Xaqani və Sabir mənim üçün çox dəyərli ədəbiyyat xadimləri oldular. Sabiri Türkiyədə tanıtmağa çalışdım. Radio proqramında ondan bəhs etdim və şairin şeirlərinə bəstələnmiş bir neçə mahnını səsləndirdim.  

Bu gün muzeyi ikinci dəfə ziyarət etdik. Yenə çox məmnun qaldıq.

Bütün çalışanlara və muzey rəhbərliyinə təşəkkürümüzü bildiririk”.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.