Mədəniyyət kanalında “Vətənim” verilişinin Azərbaycan ədəbiyyatı və fəlsəfi fikrinin görkəmli nümayəndəsi İmadəddin Nəsimiyə həsr olunan buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedən verilişdə Nəsiminin şəxsiyyətindən, yaşadığı dövrdən, onun təbliğ etdiyi hürufilik dini-fəlsəfi təlimindən, şairin əsərlərinin dil və üslub xüsiyyətlərindən bəhs olunub.

Bildirilib ki, XIV yüzilin sonları, XV əsrin əvvəllərindən bir Nəsim əsməyə başladı, o, artıq 6 əsrdir ki Azərbaycan insanı ilə birlikdədir. O saf Nəsim dilimizin göyçəkliyi, musiqisi ilə doludur, məhəbbətlə çağlayır, həm də mübarizədən, mətanətdən, qüdrətdən deyir. 

Akademik Rafael Hüseynov qeyd edib ki, sabahın Nəsimisi olacaq Seyid Məhəmməd İmadəddin dünyaya 1369-cu ildə gəlib, insanları məftun edən şeirlər ərsəyə gətirib. "Hüseyni", "Seyid Hüseyni", "Seyid" təxəllüsləri ilə yazıb. Nəsimi məsləkindən, əqidəsindən dönməyib, böyük yolunu davam etdirib. Mətanətliyi, sınmazlığı, yenilməzliyi, mərdanəliyi ilə gələcək nəsillərə məğlub olmamaq, daha gözəl sabahlara ümid bağlamaq dərslərini verib.

"Nəsimi və Nəsimi qəblindən olan mübarizlər sadəcə şair və ədəbiyyat adamı deyillər", - deyən akademik Rafael Hüseynov ədəbiyyat adamının silahının həmişə onun qələmi olduğunu söyləyib. Vurğulayıb ki, mümkün cəzalar ədəbiyyat adamlarını çəkindirməyib, onlar ömürləri və ölümləri ilə bəşəriyyətə dərs verməyi bacarıblar. Həllac Mənsurun nəfəsi dəyən Nəsimi elə onun kimi şəhidlik zirvəsinə ucalıb, Həllac Mənsurun yolunu gedib. Əqidəsi uğrunda bu cür fədakarlıq göstərməyə hazır olan Nəsimi Mənsura heyran kəsilib və öz əsərlərində onu tərənnüm edib.

Diqqətə çatdırılıb ki, Nəsimilər heç vaxt bir xalqın övladı olmur. Onlar məslək adamı olduğundan, çərçivələrə sıxmadığından və hansı dildə yazmasından asılı olmayaraq dünyaya "insanlığın şairi" kimi gəlirlər. O düşüncə, ilham sahibləri yazıb-yaradıb, gələcək nəsillərə insan düşüncələrinin sərbəstliyinə həsr edilmiş kitablar yadigar qoyublar.

Vurğulanıb ki, Nəsimi bir cərəyan axtarışında olub. Yaradıcılığının ilk dövrlərində ustadı Nəimi kimi sufizm mövqeyində dayanıb və tanınmış sufi şeyxi Şiblinin təlimini davam etdirib. Tədricən Nəsiminin dünyagörüşündə sufilik hürufiliklə əvəz olunub. 

Akademik Rafael Hüseynov qeyd edib ki, İslam şərqinin hər üç hakim dilində- ərəb, fars və türk dillərində humanist ruhlu əsrlər qələmə alan Nəsimi həyatdan faciəli şəkildə köçüb. O, əvvəl öldürülüb, sonra insanları qorxutmaq məqsədi ilə dərisi soyulub. Bəşər tarixində əbədililik qazanan Nəsimi ölümü ilə insanlara dərs verib.

“Vətənim” verilişini buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.