Azərbaycan Radiosunda Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında “Axşam görüşləri” proqramının növbəti buraxılışı yayımlanıb.

Budəfəki proqram "Leyli və Məcnun" operasının yaranma tarixinə həsr olunub.

Akademik Rafael Hüseynov bildirib ki, Şərqdə ilk opera kimi tarixə düşmüş “Leyli və Məcnun” ilk dəfə 1908-ci ilin yanvarında səhnəyə qoyulub. Bir əsrini tamamlayaraq növbəti 100 ilinə keçən "Leyli və Məcnun" operası bu gün də aktuallığını itirməyib. Neçə-neçə Leylilərin, Məcnunların yetişməsində, Azərbaycan ifaçılıq sənətinin inkişafinda böyük rol oynayan tamaşa Şərqin iki böyük dahisinin xalqımıza əvəzsiz töhfəsidir. Məhəmməd Füzuli və Üzeyir Hacıbəyov ruhunun nuru qəlbimizə, zövqümüzə dirilik verir. Ppera teatrının səhnəsindən düşməyən "Leyli və Məcnun" operası bu gedişlə yolunu davam etdirəcək, yaşayacaq və yaşadacaq.

Diqqətə çatdırılıb ki, Şərqin görkəmli şair və mütəfəkkiri Nasir Xosrov (1004–1088) "Səfərnamə" əsərində səyahət etdiyi, gördüyü yerlərin, insanların, hadisələrin xatirəsini yaşadır. O, öz gözləri ilə bir mənzərəyə də şahid olub. Ədib insanların ziyarət etdiyi türbənin, məzar yerinin qalıqlarını - Leyli ilə Məcnunun qəbrini gördüyünü nəql edib. Deməli, XI əsrdə o iki aşiq insalara məzarlarının göz qabağında olduğu qədər yaxın olublar.

"Dahi Məhəmməd Füzuli Leyli ilə Məcnun haqqındakı pərişan dastanını o məzarın yarandığı ilk günlərin təviri ilə tamamlayırdı", - deyən akademik Rafael Hüseynov bildirib ki, qəbilə əhlinin iştirakiyla Leylinin qəbri açılaraq Qeysin cəsədi o məzara qoyulmuşdur.