Mədəniyyət kanalında “Vətənim” verilişinin Azərbaycan poeziyasının görkəmli nümayəndəsi, repressiya qurbanı, unudulmaz şair Mikayıl Müşfiqə həsr olunan ilk buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedən verilişdə nakam şairin həyat və yaradıcılığından, onun milli ədəbiyyatımızdakı yerindən, poeziyasının səciyyəvi cəhətlərindən bəhs olunub.

Verilişdə Mikayıl Müşfiqin ən məşhur şeirlərindən olan "Yenə o bağ olaydı" şeirinin tarixçəsindən danışıb. Bildirib ki, şair bu şeirini 1936-cı ilin qayğısız yay günlərində Pirşağıda yazıb. Həmin şeir yarananda gənc şairin həbsə atılmasına, işgəncələrə məruz qalmasına, sonra da Nargində güllələnməsinə çox qalmamışdı. Şeirin ünvanı uzun müddət naməlum qalıb. Bəziləri düşünüb ki, Müşfiq şeiri həyat yoldaşı Dilbər xanıma yazıb, digərləri şeirin ünvanını tanısalar da, bu haqda danışmayıblar. Şayiələr gəzib. Yalnız ötən əsrin sonunda o qızın adı açıqlanıb. Şair "Yenə o bağ olaydı" şeirini yazıçı Ənvər Məmmədxanlının bacısı Arifə Məmmədxanlıya yazıb. 

“Vətənim” verilişini buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.