Azərbaycan Televiziyasında "Millət təqvimi" verilişinin Azərbaycan Dövlət Teatr Muzeyinin mübarizəli yolundan bəhs edən növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedən verilişdə qabaqcıl mədəniyyət ocaqlarından biri olan Azərbaycan Teatr Muzeyinin tarixindən, Muzeyin direktoru Ağakərim Şərifovun Azərbaycan teatrının inkişafındakı xidmətlərindən, zəngin sənət irsindən, Əbdürrəhim bəy Haqverdiyevlə söhbətlərindən bəhs olunub.

Diqqətə çatdırılıb ki, 1937–1938-ci illərin acı yelləri teatr xadimlərinin, Dövlət Teatr Muzeyinin üstündən də əsib, milli teatrımızın inkişafına ağır zərbə vurub. Həmin illərdə bir sıra teatr xadimləri repressiyaya məruz qalıblar. Bunların arasında Dövlət Teatr Muzeyinin direktoru Ağakərim Şərifovun qohumları da vardı. Məhz həmin illərdə muzeyin elmi işçisi Afərin Məmmədbəyova öz həyatını təhlükəyə qoyaraq repressiya qurbanlarının muzeydəki əşyalarını gizlədib, ələ keçməkdən qoruyub və beləliklə həmin sənədlər bu günümüzə gəlib çatıb.

Akademik Rafael Hüseynov qeyd edib ki, 1934-cü ildə Teatr Muzeyi təsis olunaraq Dövlət statusu ilə fəaliyyətə başlayıb. Həm muzeyin yaradılmasında, həm Azərbaycan teatrının inkişafında önəmli xidmətləri olmuş Cəfər Cabbarlının vaxtsız ölümü nəzərə alınaraq, 1935-ci ildə muzeyə onun adı verilirb O gündən bəri muzeyin fondunun zənginləşməsi istiqamətində ardıcıl, gərəkli işlər görülüb. Müxtəlif illərdə bu müəssisəyə tanınmış insanlar rəhbərlik ediblər. Bir müddət Ağakərim Şərifov, sonra görkəmli dramaturqumuz Sabit Rəhman, daha sonra Cəfər Cabbarlının həyat yoldaşı Sona xanım Cabbarlı, dahi dramaturq Hüseyn Cavidin qızı Turan Cavid, ardınca isə Əməkdar mədəniyyət işçisi Nuridə Nurullayeva muzeyə rəhbərlik ediblər. 

Onun sözlərinə görə, Ağakərim Şərifovun Azərbaycan rəssamı Həsən Haqverdiyev tərəfindən çəkilmiş portreti hazırda muzeydə qorunmaqdadır. 

Verilişdə, həmçinin Azərbaycan Dövlət Teatr Muzeyində uzun illər fəaliyyət göstərmiş əməkdaşlardan da bəhs olunub.

Bildirilib ki, 1963-cü ildə Azərbaycan Dövlət Teatr Muzeyi ləğv edilib və Nizami adına Azərbaycan Ədəbiyyatı Muzeyinin Teatr və dramaturgiya şöbəsinə çevrilib. Respublika hökuməti 1968-ci ildə həmin şöbənin bazasında "C.Cabbarlı adına Azərbaycan Dövlət Teatr Muzeyinin təşkili haqqında" qərar qəbul edib. Nizami adına Azərbaycan Ədəbiyyatı Muzeyinin binasının IV mərtəbəsindəki otaqlar yeni yaradılmış muzeyə verilib. Bu otaqlarda yalnız muzeyin fond əşyalarını və əməkdaşlarını yerləşdirmək mümkün olub. Azərbaycan Dövlət Teatr Muzeyinin tarixində ən əlamətdar köçürülmə 1991-ci ildə baş verib. Azərbaycanda muzey məqsədilə tikilmiş ilk və yeganə bina – keçmiş V.İ.Lenin Mərkəzi Muzeyin Bakı filialının binası Mədəniyyət Nazirliyinə verildikdən sonra burada "Muzey Mərkəzi" yaradılıb, Azərbaycan Xalçası və Xalq Tətbiqi Sənəti Dövlət Muzeyi və Azərbaycan İstiqlal Muzeyi ilə yanaşı, Dövlət Teatr Muzeyi də bu binada yerləşdirilib. Teatr Muzeyi bu peşəni sevən və dəyər verən etibarlı əllərdən əllərə bir əmanət kimi ötürülərək bu günümüzə gəlib çıxıb. 

"Millət təqvimi"ni buradan izləyə bilərsiz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.