Mədəniyyət kanalında “Vətənim” verilişinin Nizami Gəncəvi adına Milli Azərbaycan Ədəbiyyatı Muzeyinin söz heykəllərinə həsr olunan ikinci buraxılışı yayımlanıb.

Nizami Muzeyinin direktoru, akademik Rafael Hüseynovun təqdimatında efirə gedən verilişdə qədim Azərbaycan abidələrindən bəhs olunub, 

Akademik Rafael Hüseynov qeyd edib ki, Azərbaycanın dörd bucağında qədimi daş heykəllər var. Onlardan biri də yaşı 2 min ildən çox olan Ağdam rayonunun Boyəhmədli kəndi yaxınlığında (əslində Mollalar kəndi ərazisində) tapılmış, əllərini göyə açmış daş insan heykəlidir. 191970-80-ci illərdə şəkli çəkilmiş bu alban daş heykəlinin sonrakı aqibəti barədə məlumat yoxdur. Azərbaycanın bizə bəlli olan ən qədim abidəsinin içərisində bir rəmz var, sonu bitəcəyi bilinməyən göylər kimi sözün də nəhayəti yoxdur.

"İnsanlar bütün dövrlərdə hansısa duyğularını, istəklərini heykəlləşdirməyə həmişə nail olublar", - deyə bildirən akademik Rafael Hüseynov vurğulayıb ki, özündə əbədiyyət yaşadan sözə insanlar həmişə abidələr qoyublar. Hər xalq ölməz söz abidələri yaradanları yaşatmaq istəyib. Azərbaycanda bu yol yüz ildən biraz əvvəl başlayıb. Bu zaman içərisində əsrlər və minillərcə yaşayacaq böyük söz yaradıcılarımızın abidələri insanlığa yadigar qoyulub. Onların yaratdıqları söz mücəssimələri də həmişə yaşayacaq, özlərinin heykəlləşmiş surətləri duyğularımızda, düşüncələrimizdə var olacaq, Azərbaycan heykəltaraşlarının yaratdıqları o böyük ədiblərin abidələri də həmişə gözümüz qarşısında vüqarla ucalacaq.

O, 2000-ci illərin əvvəllərində Nizami Muzeyi yenidən qurularkən bu mədəniyyət ocağında dərin ensiklopedik zəkaya malik Azərbaycan alimi və mütəfəkkiri Xacə Məhəmməd Nəsirəddin Tusiyə aid ayrıca otağın yaradıldığını diqqətə çatdırıb. Həmçinin unudulmaz heykəltaraş, Xalq rəssamı Akif Əsgərov tərəfindən hazırlanmış Nəsirəddin Tusiyə aid əsərin muzeydə qorunduğunu bildirib. Bundan başqa, Azərbaycanın ilk monumentalçı qadın heykəltəraşı, Əməkdar rəssam Münəvvər Rzayevanın böyük İmadəddin Nəsiminin qolu bağlı dara çəkildiyi anı təsvir edən əsərinin də Nizami Muzeyində nümayiş etdirildiyini deyib. 

Bildirilib ki, Xalq rəssamı Fuad Əbdürrəhmanov ilk monumental əsəri olan Füzulinin heykəlini 1939-cu ildə Nizami Muzeyinin eyvanında yaradıb. Ardınca isə Ömər Eldarov Tokay Məmmədovla birgə dahi mütəfəkkirin möhtəşəm abidəsini ərsəyə gətiriblər. 1950-ci illərdə, o zamanlar hələ tələbə olan gələcəyin Xalq rəssamı Elcan Şamilov tərəfindən yaradılmış Füzuli heykəli də Nizami Muzeyinə hədiyyə edilib.

Akademik Rafael Hüseynovun sözlərinə görə, XVIII əsrdə yaşamış Azərbaycan şairi, məşhur siyasi və ictimai xadim Molla Pənah Vaqifin ilk abidəsi 1940-cı illərin başlanğıcında Nizami Muzeyində yaradılıb. 1934-cü ildə ucaldılan dahi mütəfəkkir Mirzə Fətəli Axundzadə heykəli isə yəhudi Pinxos Sabsay tərəfindən hazırlanıb. O, həmçinin muzeydə azərbaycanlı jurnalist, maarifçi, naşir Həsən bəy Zərdabinin, Qarabağ xanı İbrahimxəlil xanın nəvəsi, Mehdiqulu xanın qızı olan Xurşidbanu Natəvanının, eləcə də Azərbaycanın görkəmli satirik şairi Mirzə Ələkbər Sabirin və böyük demokrat ədib Cəlil Məmmədquluzadənin heykəllərinin saxlanıldığını bildirib.

"Vətənim" verilişini buradan izləyə bilərsiz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.