2026-cı il üçün təsdiq edilmiş Mülki Müdafiə tədbirləri planına uyğun olaraq 13 fevral 2025-ci il tarixdə Nizami Gəncəvi adına Milli Azərbaycan Ədəbiyyatı Muzeyində Mülki Müdafiə (MM) qüvvələrinin xəbərdarlıq və toplanış məşqi təşkil olunmuşdur.

Məşqə Muzeyin Mülki Müdafiə qüvvələrinin komandir-rəis heyəti və MM manqalarının üzvləri cəlb edilmişdir. Tədbiri giriş sözü ilə Muzeyin Mülki Müdafiə Qərargahının rəisi İsmayıl Muxtarov açaraq məşqin MM tədbirləri planına əsasən keçirildiyini diqqətə çatdırmışdır. O, məşqin əsas məqsədinin xəbərdarlıq sisteminin mövcud vəziyyətinin yoxlanılması, həmçinin Mülki Müdafiə qüvvələrinin şəxsi heyətində xəbərdarlıq və operativ toplanış bacarıqlarının formalaşdırılması olduğunu qeyd etmişdir.

Daha sonra Təchizat və Xidmət şöbəsinin müdiri Y. Zeynalov çıxış edərək iş yerlərində yanğın təhlükəsizliyinin təmin olunması, yanğınların qarşısının alınması yolları barədə ətraflı məlumat vermiş və şəxsi heyətə müvafiq təhlükəsizlik qaydaları izah edilmişdir.

Məşq zamanı Mülki Müdafiə qüvvələrinin şəxsi heyətlə komplektləşdirilmə vəziyyəti, tabel əmlakı ilə təminatı, eləcə də verilmiş tapşırıqlar üzrə nəzəri bilik və hazırlıq səviyyəsi yoxlanılmışdır.

Tədbirin sonunda məşqin nəticələri ətraflı təhlil edilmiş, MM manqalarının rəhbərləri və üzvlərinə aşkar edilmiş nöqsanların aradan qaldırılması və fəaliyyətin daha da təkmilləşdirilməsi məqsədilə müvafiq tövsiyələr verilmişdir.

Keçirilmiş məşq zamanı qarşıya qoyulmuş məqsədlərə tam şəkildə nail olunmuşdur.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.