Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında yayımlanan veriliş "Azad Azərbaycan" Teleradio Şirkətinin bədii şura sədri, Əməkdar jurnalist, Bakı Slavyan Universitetinin professoru Etibar Babayevə həsr olunub.

Akademik Rafael Hüseynov Etibar Babayevin 1950-ci il dekabrın 15-də Bakı şəhərində şair-dramaturq Adil Babayevin ailəsində dünyaya gəldiyini bildirib. Qeyd edib ki, Etibar Babayev ali təhsilini M. Əliyev adına Azərbaycan Dövlət İncəsənət İnstitutunun Teatrşünaslıq fakültəsində alıb. Erkən yaşlarından o, partiya, dövlət işinə cəlb edilib. 25 yaşında ikən Azərbaycan Kommunist Partiyası Mərkəzi Komitəsinin Mədəniyyət şöbəsində təlimatçı, daha sonra Bakı şəhər Partiya Komitəsinin Təbliğat-təşviqat şöbəsinin müdiri  kimi məsul vəzifələrdə çalışıb. 1981–1989-cu illərdə Bakı Şəhər Sovetinin deputatı seçilib. 1989–1992-ci illərdə "Azərbaycantelefilm"in direktoru, Azərbaycan Dövlət Teleradio Şirkətinin sədr müavini vəzifələrində çalışıb. 

Diqqətə çatdırılıb ki, Etibar Babayev 1970-ci illərin ortalarından televiziyada "Tələbə klubu", "Yeddinci qitə", "Sözlü-nəğməli İstanbul", "Kanal-6 təqdim edir" kimi populyar verilişlərin müəllifi və aparıcısı olaraq tamaşaçıların rəğbətini qazanıb. O, arxada qalan onillər boyu həmişə Vətənə, dövlətə, millətə sədaqət və ləyaqətlə xidmət edib. Onun publisistikamız və jurnalistikamız qarşısında əməkləri də ən yüksək təqdirlərə layiqdir. Mükəmməl idarəçilik, təşkilatçılıq təcrübəsi qazanmış Etibar Babayev hazırladığı verilişlərlə Türkiyənin ən böyük şəhəri İstanbulu bizə tanıtmağa çalışıb, xalqlarımızı bir-birinə daha yaxın etməyə nail olub.

Akademik Rafael Hüseynov Etibar Babayevlə 1970-ci illərin ortalarında Azərbaycan televiziyasında verilişlər apardıqları zaman yaranan dostuq və səmimi münasibətlərindən danışıb, atasının ona verdiyi Etibar adını ömrü boyunca doğrultmağı bacardığını bildirib.

Qeyd olunub ki, Etibar Babayev həm də elmi-pedaqoji fəaliyyətlə məşğuldur. 2001-ci ildən Azərbaycan Dövlət Mədəniyyət və İncəsənət Universitetində, daha sonra Bakı Slavyan Universitetində dərs deyir. 2009-cu ildən Jurnalistika kafedrasının müdiri seçilib. 2010–2013-cü illərdə Azərbaycan Televiziya və Radio verilişləri Qapalı Səhmdar Cəmiyyətində yeni yaradılan Teleradio Akademiyasında rektor olub.

Verilişdə Etibar Babayev atası şair-dramaturq Adil Babayevlə bağlı xatirələrini bölüşüb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.