Bakı Xoreoqrafiya Akademiyasında (BXA) görkəmli Azərbaycan şairi və dramaturqu Hüseyn Cavidin həyat və yaradıcılığına həsr olunmuş elmi-mədəni görüş keçirilib. Tədbir akademiyanın orta ixtisas təhsili pilləsinin “Tarixi şəxsiyyətlərin ədəbi fəaliyyəti” adlı silsilə layihəsi çərçivəsində baş tutub.

BXA-nın Azərbaycan dili və ədəbiyyatı müəllimi Mehriban Haqverdiyevanın layihə rəhbərliyi və tarix müəllimi Aygül Qurbanovanın təşkilatçılığı ilə reallaşan görüşdə Nizami Gəncəvi adına Milli Azərbaycan Ədəbiyyatı Muzeyinin əməkdaşları məruzələrlə çıxış ediblər.

Tədbirdə filologiya üzrə fəlsəfə doktoru Sevinc Heydərova “Hüseyn Cavid düşüncəsində qadın” mövzusunda çıxış edərək, ədibin əsərlərində qadın obrazlarının fəlsəfi-estetik mahiyyətindən söz açıb. S. Heydərova qeyd edib ki, Hüseyn Cavid qadını yalnız bədii obraz kimi deyil, həm də cəmiyyətin mənəvi dirçəlişinin əsas qüvvəsi kimi dəyərləndirib.

Daha sonra filologiya üzrə fəlsəfə doktoru Nuranə Əsədullayeva “Hüseyn Cavid yaradıcılığında türklüyə münasibət” sərlövhəli məruzəsində sənətkarın əsərlərində türkçülük və türk birliyi ideyalarının mühüm yer tutduğunu  vurğulayıb. Bildirib ki, şair həm şeirlərində, həm də dram əsərlərində türk dünyasının birliyi, ortaq dili və mənəvi dəyərlərinin qorunmasını  əsas ideyalardan biri  kimi təqdim  edib.

Sonda kulturologiya üzrə fəlsəfə doktoru Nailə Əliyeva “Hüseyn Cavid irsinin Nizami muzeyinin ekspozisiyasında təqdimi” mövzusunda  çıxış edərək muzeydə Cavid irsinin nümayişindən bəhs edib. O, ekspozisiyada sənətkarın həyat və yaradıcılığını əks etdirən materiallardan, nəşrlərdən söz açaraq Hüseyn Cavid irsinin müasir dövrdə öyrənilməsi və təbliğinin əhəmiyyətini vurğulayıb.

Tədbidə, həmçinin BXA-nın rəhbərliyi və müəllim-tələbə heyəti ilə yanaşı tanınmış ziyalılar – filologiya üzrə fəlsəfə doktoru, professor Ədalət Tahirzadə, filologiya üzrə fəlsəfə doktoru, Əməkdar mədəniyyət işçisi Azər Turan, Hüseyn Cavidin ev-muzeyinin böyük elmi işçisi Nübar Məmmədova da iştirak edərək dəyirmi masa ətrafında öz fikirlərini bölüşüblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.