Azərbaycan Radiosunda Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında “Axşam görüşləri” proqramının növbəti buraxılışı yayımlanıb.

Budəfəki proqram həyatını, elmi və ictimai fəaliyyətini doğma xalqının tərəqqisinə həsr edən, tanınmış şərqşünas alim, filologiya üzrə fəlsəfə doktoru, dosent Əsmətxanım Məmmədovanın yaradıcılığına həsr olunub.

Akademik Rafael Hüseynov bildirib ki, Əsmətxanım Məmmədova 1941-ci ildə Bakının Maştağa kəndində ziyalı ailəsində anadan olub. O, fars və ərəb dillərini mükəmməl bilən, öz dövrünün tanınmış ziyalısı, repressiya qurbanı, ana babası Əbdülqasım Şəkərzadənin əziz və niskilli xatirəsinə ehtiram olaraq şərqşünas olmağı qərara alıb. Bu məqsədlə sənədlərini ADU-nun (indiki BDU-nun) Şərqşünaslıq fakültəsinə təqdim edərək yüksək balla fars şöbəsinə qəbul olunub. 

"Əsmətxanım Məmmədova artıq 70 ilə yaxındır həmin yolu getməkdə, sadiq sədaqətlə Şərqşünaslıq fakültəsində çalışmaqdadır. Bu illər ərzində o, yüzlərlə tələbə yetişdirib, elmimizi zənginləşdirən çoxsaylı kitablar ərsəyə gətirib", - deyə akademik Rafael Hüseynov əlavə edib.

Diqqətə çatdırılıb ki, Əsmətxanım Məmmədova 1972-ci ildə “Fars dili söz vurğusunun  fonetik təbiəti və yeri” adlı nami­zədlik dissertasiyasını müdafiə edib.  Bu günə qədər alimin fars dilinin fonetika, orfoqrafiya, morfologiya, sintaksis, leksika, üslubiyyata aid olmaqla, 200-ə qədər məqaləsi ölkə daxilində və respublikadan kənarda işıq üzü görüb. Onun fars vurğusunun təbiətinə aid eksperimentə əsaslanan 60 səhifəlik məqaləsi İranda müxtəlif illərdə 4 dəfə çap olunub. Alimin elmi axtarış və düşüncələrini özündə ehtiva edən bu tədqiqat işləri fars dilinin tədrisində xüsusi yer tutur və mütəxəssislər tərəfindən yüksək qiymətləndirilir. 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.