Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında yayımlanan proqram Azərbaycanda radio və televiziya yayımının tarixi inkişaf yoluna həsr olunub. 

Proqram Azərbaycan radiosunun 100, televiziya yayımının isə 70 illiyi münasibətilə hazırlanıb.

Akademik Rafael Hüseynov qeyd edib ki, Azərbaycan televiziya və radiosu milli dəyərlər və dövlətçilik təfəkkürü əsasında yaradılmış məktəbə çevrilib və bu gün də ölkənin televiziya məkanında aparıcı rolunu saxlamaqdadır. 100 illik uzun yol boyunca bu tele məkanda zəngin irs yaradılıb, Azərbaycan radiosu və televiziyası millətin ən qiymətli universitetlərindən birinə çevrilib. Burada ən xırda uşaqdan tutmuş, böyük alimlərə kimi hamı dərs alıb, dəvətsiz hər gün insanların evlərinə qonaq gəlib, milləti bütövləşdirib, içəridən gücləndirib, ən uzaq dalğaları ilə hamının doğmasına çevrilib.

Ömrünü efirlərə həsr edənlərin sırasında Əməkdar incəsənət xadimi Çingiz Abbasovun xidmətlərini xüsusi vurğulayan akademik Rafael Hüseynov onun 53 ildir televiziya məkanında çalışdığını, həyatını milli musiqimizin təbliğinə həsr etmiş sənət fədailərindən olduğunu bildirib. Diqqətə çatdırıb ki, əslən Zərdab rayonundan olan Çingiz Abbasov uzun illərdir “Azərbaycan Televiziya və Radio Verilişləri” Qapalı Səhmdar Cəmiyyəti Musiqi və əyləncəli proqramlar redaksiyasının böyük redaktoru kimi fəaliyyət göstərir. Onun fədakar əməyi dövlətimiz tərəfindən layiqincə qiymətləndirilib. Azərbaycan Televiziya və Radiosunun inkişafındakı xidmətlərinə görə Prezident İlham Əliyevin Sərəncamı ilə 2006-cı ildə “Tərəqqi” medalına, 2011-ci ildə isə “Əməkdar incəsənət xadimi” fəxri adına layiq görülüb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.