Mədəniyyət kanalında Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında “Vətənim” verilişinin növbəti buraxılışı yayımlanıb.

Budəfəki veriliş Azərbaycan Yazıçılar Birliyinin sədri, Xalq yazıçısı Anara həsr olunub.

Akademik Rafael Hüseynov Anarın yaradıcılığından və ictimai fəaliyyətindən, nəsrindəki çoxşaxəli istiqamətlərdən, əsərlərinin obrazlar sistemindən danışıb. Qeyd edib ki,  Anar yazdığı əsərləri ilə nəinki ölkəmizin, bütün türk dünyasının sevimli yazıçısı kimi tanınır. Onun çoxşaxəli yaradıcılığı, bədii və publisistik əsərləri, kinofilmləri xalqa sədaqətlə xidmət еtmək nümunəsidir.

"Azərbaycan xoşbəxtdir ki, onun Anarı var" - deyə bildirən akademik Rafael Hüseynov qeyd edib ki, zamanlar keçdikcə Azərbaycanda millət quruculuğu yolunda zəhmət çəkmiş insanların fəxrli sırası daim xatırlanacaq və onlardan hansının bu millətə nələr bəxş etdiyi haqqında düşüncələrə həmişə dalınacaq. Anar böyük ədəbiyyata gəldiyi 1960-cı illərdən başlayaraq 1970-lərdə də, 1980-lərdə də, 1990-larda da millətin sözünü deyən, millətin ruhunu ifadə edən oldu, 2000-ci illərdir, Anar yenə həminki Anardır.

Diqqətə çatdırılıb ki, Anarın XX əsrin ikinci yarısını dolduran, XXI əsrin ilk onilləri boyu davam edən yaradıcılığı əslində şanlı babaların fəaliyyətlərinin yekunudur. O işləri ki Mirzə Fətəli, Həsən bəy Zərdabi görürdü, o çalışmalar ki onların ardınca Əli bəy Hüseynzadə, Üzeyir bəy Hacıbəyli, Mirzə Cəlil və onların silahdaşları aparırdı, həmin xətti Anar davam etdirdi, babaların gördüyü böyük işlərin ağırlığını sürətləri artan XX əsrdə, inkişafın büsbütün yeni mərhələsinə qalxan XXI əsrdə çiyinlərinə götürdü. 

Bildirilib ki, Anar Azərbaycanın iki tanınmış şairinin övladı kimi dünyaya gəlib. Onun atası, böyük Azərbaycan şairi Rəsul Rza hələ cavanlığında "mübarizə bu gün də var, yarın da, mən də onun ən ön sıralarında" demişdi. Bu sözlər elə Anara da aiddir. Rəsul Rza o misraları qələmə alandan sonra onillər boyu mübarizələrin, millətə xidmətin ön cərgələrində oldu. Anar da həmin yolu tutub gedən böyük yaradıcıdır. 

Akademik Rafael Hüseynov vurğulayıb ki, Anar örnək əsərlər yaradıb, milləti daha çox yaxşısıyla özünə göstərib, insanımızın bütün milli ləyaqətləri və üstünlükləri ilə özünü özünə tanıtmağa səy göstərib. O, böyük ədəbiyyatda olduğu yeddi onil boyunca çox əsərlər yaradıb, ədəbiyyatın ən müxtəlif istiqamətlərinə üz tutub. Nizami Gəncəvinin adını daşıyan Ədəbiyyat muzeyi Anarın ilk iş yeri olub, sonra Azərbaycan Radiosunda və televiziyada işləyib. 1969-cu ildə gənc Anar Azərbaycanda çıxan yeni bir dərgiyə - "Qobustan"a rəhbərlik etməyə başlayıb və ömrünü 20 il bu jurnalla bağlayıb.

Onun sözlərinə görə, 1987-ci ildə Anar Yazıçılar Birliyinin rəhbərliyinə gəlib və buradakı mühafizəkar şəbəkəni qısa müddətdə sındırıb, gənclərə, işıqlı yaradıcılığa meydan açıb.

Akademik Rafael Hüseynov Ümummilli Lider Heydər Əliyevin və Prezident İlham Əliyevin yazıçının ədəbi-bədii irsinə yüksək dəyər verdiklərini, onun dövlətimizin ən ali mükafatları ilə təltif olunduğunu qeyd edib.

Verilişdə, həmçinin 1988-ci ilin martında Xalq yazıçısı Anarın 50 illik yubleyi ərəfəsində yayımlanmış "Vətənim" verilişindən süjet də nümayiş etdirilib.

“Vətənim” verilişini buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.