Martın 3-də Nizami Gəncəvi adına Milli Azərbaycan Ədəbiyyatı Muzeyində təcrübə keçən Bakı Dövlət Universiteti Şərqşünaslıq fakültəsinin IV kurs tələbələri  növbəti seminar məşğələsində iştirak ediblər.

Məruzəçi – muzeyin “Komparativistika və bədii tərcümə” şöbəsinin elmi işçisi Zarema İbrahimova İraq türkman ədəbiyyatı mövzusunda məruzə edərək tələbələri bu irsin tarixi poetikası, inkişaf yolları və sənətkarlıq xüsusiyyətləri ilə tanış edib. O, bildirib ki, İraq türkman yazarları milli kimliyi, dil və mədəni irsi qoruyaraq ədəbiyyatı yeni mövzu və janrlarla zənginləşdirməkdədirlər. Məruzəçi, həmçinin sözügedən ədəbiyyatın məşhur ədib nümayəndələrinin də adlarını sadalayaraq onların əsərlərindən nümunələr göstərib.

Bildirilib ki, İraq türkman ədəbiyyatının yorulmaz tədqiqatçısı, ədəbiyyatşünas alim Qəzənfər Paşayevin bu mövzuda dəyərli əsərləri və türkmanların məişət tərzi, etnoqrafiyasını yaşadan maddi-mədəniyyət nümunələri Nizami Gəncəvi adına Milli Azərbaycan Ədəbiyyatı Muzeyinə hədiyyə edilmişdir. Toplanan dəyərli əşya və kitablar muzeyin İraq türkmanlarına həsr olunmuş otağında nümayiş olunur.

Seminar məşğələsi tələbələrin mövzu ətrafında sual və çıxışları ilə davam etmişdir.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.