Martın 17-də Bakı Dövlət Universitetinin Şərqşünaslıq fakültəsinin tələbələri ilə Nizami muzeyində növbəti dərs saatı baş tutmuşdur.

  Muzeyin “Yeni və müasir Azərbaycan ədəbiyyatının tədqiqi və təqdimi” şöbəsinin elmi işçisi Törəxanım Hüseynova görkəmli Azərbaycan maarifçisi, şair, yazıçı, tarixçi və pedaqoq, ictimai-siyasi xadim Abbasqulu ağa Bakıxanov irsi haqqında tələbələrə ətraflı məlumat vermişdir.

 Bildirilmişdir ki, Abbasqulu ağanın ədəbi dünyagörüşünün və şeir zövqünün təşəkkülündə bir tərəfdən şifahi xalq ədəbiyyatı və klassik Şərq poeziyası ənənələri, digər tərəfdən dövrün keşməkeşli və mürəkkəb axını, ədibin Şərqə və Qərbə ardıcıl səfərləri, dövrün mütərəqqi ziyalıları ilə tanışlığı və dostluğu böyük rol oynamışdır. 

Törəxanım, “Qüdsi” təxəllüsü ilə yazan Bakıxanovun lirikasında hər şeydən əvvəl, səmimi və pak məhəbbətin, eşqin tərənnüm olunduğunu vurğulayır. O, qeyd edir ki, təbiətdə hər bir hərəkətin aparıcı qüvvəsi eşqdir. Ancaq təmiz eşq insanı kamala çatdıra bilər. Bu ruhda yazılmış “Bülbül necə bimar ətəyindən əlin üzsün”, “Sənsiz dili-xəstə zar olubdur”, “Tatar (Azərbaycan) nəğməsi”, “Fatma tar çalır”, “Şəklin göstərir” və s. şeirləri buna misaldır.

Törəxanım Hüseynova dərs boyu XIX əsr ziyalısı və maarif xadiminin zəngin yaradıcılığına müraciət etmiş, onun lirikası ilə yanaşı “Kitabi-Əsgəriyyə”, “Təbriz əhlinə xitab” satirası, “Gülüstani-İrəm” və başqa elmi əsərlərində verilmiş beyt və qitələrindən nümunələri təhlilə cəlb etmişdir.

Məşğələ tələbələrlə sual-cavab şəklində davam etmişdir.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.